36週，開始水腫了 (o_0)

一踏入第36週，忽然d鞋開始迫了，之前著開有兩對鬆鬆地既鞋都迫，無鞋著，唔通真係要日日著Crocs？！手都其實有少少腫，尤其係剛剛瞓醒。有時食野既時候，覺得連個咀都腫，所以唔敢食太濃味既野。即刻煲咗d紅豆，聽聞去水腫好得，飲咗一杯紅豆水，食埋d紅豆，初頭好似有少少幫助，但之後都係腫返。個鼻又真係開始大咗少少，d人話陀仔會大鼻，大既程度因人而異，希望唔會太大啦，我得閒就“鍊”下個鼻，等佢睇落無咁大 ：P

個人又開始越來越滾，成日覺得好熱，面呀、身呀都覺得好滾，係滾到會出汗架喎，以為自己發燒，但摸過發現面、額頭、身、腳都唔熱，只係手心同腳掌熱，真係好奇怪。

Keep住有去政府健康院（32週開始每兩星期一次），但健康院只係有得聽b心跳，仲要部機其實未埋到身已經有聲，fuk fuk fuk咁聲，姑娘話係bb既心跳聲喎，我真係唔識聽，之後淨係會同你講話「正常」，但幾多為之正常呢？120bpm定150bpm？佢係唔會答你架。同你度子宮，又只係會話「正常」，問佢估計bb家陣幾多磅？個頭係邊？對腳放邊？佢就會答你：「我唔係超聲波，我唔知架」。。。另外，會同你驗尿、磅重，如果d尿有事就叫你飲d水、坐一陣，再驗多次，蛾下你話下次記住自己帶尿，要晨早未食野前第一督尿；如果重得多咗（每星期只可重1lb），就蛾下你記住要均衡飲食，個b肥得濟唔好架，再俾本飲食指南你；如果無重到呢，就蛾你要食返多d野，懷孕期間唔可以減肥架，仲問我係咪因為唔開心食唔落野，真係暈。。。次次去都係見唔同既姑娘，佢地蛾我之前又唔會睇返我overall或上星期重咗幾多，總之你唔係exactly每星期重1lb就蛾你，真係幾無奈。到你問佢野，例如我手痛、手痺，對腳紅咗一撻撻係咪正常，佢就只會叫你去睇醫生，衰d講句，健康院都真係幾廢。。。

穩陣d，都係去睇返陳醫生，睇下阿b家陣幾重、有無臍帶纏頸，同埋想見下阿b個樣，老公就想確認下阿b係咪真係囝。我同陳醫生話我個肚右邊成日凸咗出嚟，想知係咩嚟既，佢一照就睇到係腳，同埋個胎盤都側咗去右邊，再順手照到老公最想睇既野--噹噹(⌒▽⌒) 之後度下阿b個頭既size，睇下尾龍骨、腳骨、腳趾，話阿b家陣2.3kg，少少偏細，但無問題的，頭唔係特別大，臍帶纏咗一圈，跟住就照下阿b個樣，塊面肥嘟嘟，隻手又放係個咀度，好似好怕羞咁，哈哈^_^

下星期係政府會做乙型練球菌測試，我個fd話驗到有問題就最好開刀生，避免bb係陰道出世時感染到d菌，問咗健康院姑娘同陳醫生，都話就算有菌，打支針就可以如常順產，不過都希望結果正常啦。

雪胎續期

11月11日，陳醫生姑娘打嚟通知我雪胎兒們原來早於8月已經到期，問我續唔續，續就每半年$5000。一直同老公都覺得一係唔生，一生就要生兩個，好等佢地有個伴，同埋唔會有公主/公子病，所以我就自己揸主意同姑娘話先續一年，即係到出年8月。

之後同老公講咗，老公都同意，不過老公話不如到期前放埋，BB預產期出年1月，1月生完，8月前放胎，萬一中咗，我個肚咪唔洗抖？=.=''''' 另一個問題就係，咁我咪又唔洗搵工？

27-32週，懶懶懶 (_ _).｡o○

個人越來越懶，懶到blog都無寫，日日瞓到成11點先起身，早餐連午餐一次過食，之後3點幾又瞓晏覺+hea係張床度，懶到連約朋友食晏都懶，有時仲懶到晚飯都係老公放咗工返到屋企先開始煮，老公有時都睇唔過眼話我兩句，不過其實自己都頂自己唔順。

唔洗返工、唔洗做家務，只係間中煮下飯、洗下碗，對於我嚟講，呢d簡直係超級女皇既生活，不過女皇生活就只係剩返兩個月，我要好好珍惜。。。

Update返呢幾個星期做過d咩先：

27週，想來想去，去搵返林淑儀醫生，因為原來我個fd兩胎都係搵佢接生的，兩胎都順產，又任你揀邊間醫院，診所又就腳，諗住到我個肚鑼咁大既時候，復診都無咁辛苦，可惜，當佢知道我打算去政府生既時候，佢就問：「咁你今日嚟搵我想做咩？」我&老公答：「普通產檢，照下個b咁囉，順便睇下性別。」跟住林醫生就叫我瞓上床，好仔細咁同我照，頭、腳、手、噹噹、面、心、肺，感覺同我認識既林醫生好唔同（以前睇症睇得好急，問多兩句佢就趕我走），之後到照腎，佢話睇唔清，可能有事，叫我出去坐一陣再入嚟照過，咦？咁似我上個月照結構咁既？！開始有d不安，不安既係擔心阿b有事，但心諗上次照結構都無話有事，無理由而家有事架，另外不安既就係診金，照咗成半個鐘，仲要有得照多次，以我認識既林醫生，係唔會賣大包既，張單實大鑊。。。果然不出我所料，翻照阿b個腎無事，但張單就盛惠$2280，林醫生幫我照多次結構。。。老公好嬲，話佢呃錢 (•̀__•́)୨

30週，又要驗糖尿，今次有晒經驗，好輕鬆，無壓力。因為等待第二次抽血期間會播video，講下產前須知、入院程序、產後處理資料等等，所以今次叫埋老公嚟睇兼陪我。同上次一樣，有事先會有電話通知，星期一都無收到電話，又順利過一關 ^_^

31週開始，轉去西灣河健康院繼續產檢。原來係健康既媽媽&BB先會轉去健康院的，知道我同BB都健康，都幾安心。去到健康院，登記咗就去自助量血壓，第一次玩感覺幾得意，之後就去磅重同驗尿，有朋友覺得帶尿好麻煩，但我又覺得唔帶仲麻煩，事關要忍尿，又要即場去廁所，都幾費心同嘥時間，仲要俾姑娘“鵝”，叫你下次記住帶。我有次試過唔夠尿，攪到驗到有蛋白，要狂飲水，之後再驗過，都嘥咗半個至一個鐘，自此我都係帶定尿，唔洗煩。第一次去有個breifing，介紹下健康院係做咩，之後會有得見姑娘同醫生，醫生只係第一次先有得見，之後要視乎需要先有得見，不過就算有醫生見，都只係聽心跳，無得照超聲波，我覺得同見姑娘無咩分別，分別在於如果有唔舒服，可以問下佢意見，好似我對腳起咗一撻紅色，唔痕唔痛的，醫生話可以不理，生完先算，同一個問題問姑娘，佢就會叫我出去睇醫生（即健康院以外既普通科）囉。見完醫生就約下一次覆診，每兩星期一次，每次都係星期四，可以揀9am、10am或者11am，我揀咗10am。

21週，照結構

終於等到照結構的日子，開估BB究竟係囝定囡啦。之前陳醫生同莫醫生照完都話似係囝，d人又話陀囝會皮膚差，但我無喎，又話個肚形會尖d，但我又幾圓咁喎，所以真係估佢唔到。

好啦，10：30am 到東區啦。係主座登記完就上D7病房，巡例要驗尿同量血壓，之後就係等。之前幾次產檢都係等大約半個鐘，今次等咗45分鐘都無聲氣，之後聽到後面個準爸爸鬧話足足等咗兩個鐘，嘩，唔係嗎？兩個鐘，咁我咪仲有排等？！好在我食咗個豐富早餐，再買定咗個豬柳蛋漢堡先嚟啫，如果唔係咪餓屎？！最後大概11：55am 到我了，等咗差不多個半鐘。。。

醫生都好細心咁幫我照，初初都係照下頭骨、脊骨、大腿骨、小腿骨、手臂骨、手指、腳趾是否齊全，再照下有無兔唇，睇下鼻仔同眼仔，跟住我同老公已經急不及待問BB性別了，照咗好耐先照到，哈哈，見到噹噹啦，係囝呀 ≧▽≦ 

醫生繼續照肝、腎、肺，但因為BB扒咗係度，照唔清個心，醫生話一定要見到個心有4房先得，要我出去行15分鐘，等BB轉位先再試下照，出去行既時候已經成1pm，真係有d餓了，一路行一路叫BB快d轉身，等醫生照清楚晒，我先可以去食晏架。終於照到個心都正常，走得，走既時候已經差不多1：30pm了，攪咗成3粒鐘，真係好攰。。。

18週，BB展收鑊

8月1-4日係BB展，可惜小b只係得4個半月，仲要未知係囝定囡（但7成機會係囝），所以都無咩好買。不過聽閒會有好多禮品攞，我又一見到話有免費BB展入場券就登記，最終收到美贊辰送既兩張入場券，咁唔洗錢有得入場攞野就梗係去啦。我另外又登記咗美素佳兒講座（原本以為有入場券送，點知原來無，但都有禮品送，就係爛鬼tote bag一個），所以8月1日10：30am就到會展了。

第一日，晨早流流都唔算多人，不過d大牌子好似美贊辰、雀巢、牛欄牌、Pampers、荷花呢d有大禮送既，就打晒蛇餅，老公怕我會攰，全部唔准我排。

每買一張入場券（$25）會跟一本coupon book，入面有d券係攞禮品的，事關美贊辰的兩張入場券係送既，只跟一本coupon book，仲要唔知點解會無咗幾頁，所以收穫唔算豐富。老公話本coupon book可以買的，$15/本，有好多人買4本，咁就可以排一次隊，攞4份禮品，但我地最終都無買多幾本，因為唔係好知有咩好攞，費事攞埋一大推垃圾返屋企。

BB展有d騎呢攤位，好似賣咖啡機咁，我初初仲好雀躍咁走埋去問，以為佢地有孕婦飲得既咖啡賣，點知原來係無gor lor，淨係得老公有得試飲，我就試飲部打奶機打出嚟既奶，真攪笑 ╮(￣^￣)╭。另外仲攪笑既係鴻福堂，雖然我未係好見肚，亦有d人會以為我剛剛生完，但我行去鴻福堂個攤位，講明係想問薑醋券點賣，但成個攤位d人淨係叫我地買涼茶券，話家陣好抵，仲叫我地試飲，我即刻問係咪有咗都可以飲涼茶，問咗兩次，分別兩個職員都話可以攞，真係嚇屎我，係咪真係俾老細摔數摔到傻咗，孕婦可以飲涼茶都講得出，定我孤陋寡聞呢？

Anyways，最終咩都無買，淨係用咗$100，買咗個影BB 4D照既優惠，會幫BB影3張相俾我地留念（齋影相，唔會有人幫你睇下BB有無咩問題），另外攞咗4包濕紙巾、6條尿片、洗衣液、口水巾、手襪仔、沙巾、清潔棉、媽媽奶粉、等等，收穫麻麻啦 ^_^

順產 / 開刀？

今日去完St. Paul產檢，book咗莫仲威醫生，我覺得佢麻麻，有d hea，部機又照得唔係好清，埋單$455，平野即係平野。莫醫生建議我開刀，因為我年紀大，第一胎，仲要係人工的，好大幾會順唔到（大概意思係因為個b係用非自然方法得嚟既，會難d用到自然方法生出嚟）。我諗住睇埋林淑儀醫生，問多個意見，如果都係話開刀好d，就搵返陳億仕醫生。

同老公傾傾下，得出個結論，就係順產對個bb危險d，開刀就對個媽媽危險d，所以順產定開刀，唔多唔少取決於要囝定要乸。。。事關原來徐子淇咁後生都係開刀生的，d有錢人，梗係重視個孫多過個新袍啦。。。

咁我應該點呢？係咪應該為咗個b，受一條疤、同遲少少先叉燒飯、同遲少少先出街呢？

=======================

順產 VS剖腹生產 不艱難的抉擇

http://www.yes-parents.com/knowledge/article/T2/T2Y0A0011.yp

17週，驗糖尿

事關我媽媽有糖尿病，所以東區要我早d驗，更可能要驗兩次。

琴晚同一大班舊同事去咗鯉魚門食海鮮餐，知道今日要驗糖尿，所以我都好檢點，唔係食得好多，同無食蟹（孕婦大忌）。零晨12點開始禁食，只可飲清水。

個Booking係8:30am的，要先去繳費處登記，我8:20am去到，繳費處未開，事關我個fd話驗糖尿一定唔可以遲到，遲到佢會唔俾你驗，要再約過，所以我就好擔心，走去問入院登記既人，佢地話唔怕gor wor，叫我係度等繳費處8:30am開門，哦，咁得意。。。

繳費處準時8:30開門，好快就登記好，可以上D7，同時有好多準媽媽一齊上去。上到去放低張登記紙，等叫名，等抽血，大概9:30就到我飲糖水了，等既時候，見坐我前面個女仔（佢個樣真係好細）飲糖水飲到喊咁濟，另外有個準媽媽都飲到眼都紅晒，真係好擔心。

我個fd warn定我叫我唔好飲咁多水，如果唔係會好易嘔，一嘔就又要再飲過，所以我朝早飲咗半杯水之後就無再飲。到要飲糖水時，我係好口渴的，因為口渴，所以頭半杯飲得好容易，但之後驚飲得太快會嘔，所以停一停先再飲。當無咁口渴既時候，同埋唔知係咪d糖沉低，好似比較難捱，不過最終都完成到。

飲完之後覺得喉嚨乸乸地，又好飽，去咗廁所，兼用清水啷下個口，不過都係覺得個胃好脹，個喉嚨頂住，有d想嘔。我知自己係唔可以嘔架，就企下起身，等d糖水易d落隔。最終，個女仔真係嘔咗，見佢同姑娘講咗之後就走咗，我諗佢要再約時間嚟飲過啦，陰公！

等第二次抽血既期間，醫院會播d懷孕前後既video俾我地睇，教餵奶、教沖涼、教如何處理產後抑鬱、等等，都幾有用，等到11:15am，開始第二輪抽血，抽完血可以攞盒奶同餅乾，到我抽血時，姑娘問我有無食野，有無嘔，我話無（但其實真係有d想嘔），抽完血，攞咗奶同餅就急急腳走，因為我唔可以衰收尾，係醫院嘔架！搭的士返到屋企，終於可以對住個廁所，但最終嘔唔出，飲埋盒奶都嘔唔出，咁算啦 ╮(￣︶￣)╭

其實杯糖水都唔算好難飲，75g葡萄糖，大概開咗400ml水，東區醫院呢度用咖啡紙杯裝住d糖水，感覺幾好，可以幻想下自己飲緊咖啡咁，飲落就似唔涷既雪碧再甜少少咁。

化驗結果下午就會出，一如以往，有問題既媽媽先會收到電話通知，即日下午或之後既工作日（即星期一）都收唔到電話即係無事。

16週，個肚忽然震得好厲害

呢幾日都係瞓到朝早5、6點醒，會起身飲盒奶先再瞓，點知翻瞓一陣之後，個肚忽然震得好厲害，我成個人由腳到心口都俾佢震到，老公瞓隔離都feel到震，老公摸摸我個肚，話真係好震，有d驚bb會唔會係臍帶纏頸，抖唔到氣，所以震晒，但我又心諗，好似未聽過有bb 16週臍帶纏頸出事，震咗5-10分鐘先靜返落嚟。

Whatsapp問咗幾個朋友，都話唔痛無流血就無事，應該係bb係度轉身，咁就無理佢，過一陣，又陣咗一陣，之後又靜晒lu。

開刀定順產？私家定政府？12月定1月？

見完陳醫生，bb正常地長大，脊骨、腦骨、大腿骨都已經慢慢長出，可惜因為bb扒咗係度，未睇到性別，不過醫生話睇我個樣，佢估係仔。人地話陀仔既媽媽會醜咗，唔通我醜咗？ (>_<) 身體上係有點變化，甩好多頭髮，比之前甩多1至1.5倍，腳毛長得好快，唔抗拒睇波之除仲自己識醒起身睇世界盃，真係有d似係仔。

另外，係時候問問陳醫生接生價錢，醫生講到好明話唔想接順產，如果決定順產既話佢建議我去政府生，如果開刀，佢就只係去浸會，事關家陣無咗雙非，最遲可以7個月先book醫院，順產/開刀佢都係收$25000，醫院費另計，約$2-3.5萬。醫生仲話通常搵返佢接生既一定係佢既IVF成功個案，因為唔想臨尾有咩差池，會選擇開刀，收得你錢，佢亦都會好有心機聯返好個傷口。咁點好呢，係咪即係話順產風險高d？

舅父叮囑我除非俾唔起，如果唔係，一定要係私家生，佢對政府零信心。都係既，雖然東區d人係幾nice，但真係好young，個個都好似fresh grad咁，睇落資歷深d個d，個樣就好晦氣，都真係唔想咁辛苦得嚟既b臨尾香（前後洗咗成廿萬架嗎）。問過親戚朋友，有兩個fd同我老公表姐妹共8胎都係政府生，又唔見有事喎，不過政府最唔好就係每日只得兩小時探病囉，想見多老公一陣都唔得，老公想見多個b一陣又唔得。。。

咁順產定開刀好呢？事關預產期係1月1日，如果開刀就要早兩星期出世，即12月b，順產的話就可以搏元旦b（1月b），我阿嫂話12月b好難搵學校收，變相要冧一年，1月b就間間學校都搶住收。唉，好難決揀呀！！！

軟禁了自己在家13日，終於順利過渡12週(-｡-;

自從6月9日出院後，幸得家姐、表姐及朋友們幫助，幫我買餸、買飯、買生果、買麵包、買雜誌，我可以一直留係屋企，無落過街，如同軟禁在家一樣。因為家姐話佢有朋友試過3更半夜肚痛，痾到成床血，之後小產咗，所以我真係好驚。小產唔緊要，最驚攪到成床血，又得自己一個係屋企，好唔想麻煩到人地幫我清潔張床，所以我真係好乖好乖，唔敢落街，就算係屋企，都盡量坐係張轆轆櫈度，周圍轆，盡量唔企起身。

老公提早一星期返香港，老公返到嚟，我終於可以解禁，去商場行下食個Tea。（好儍的諗法：家陣就算3更半夜有咩事，都有老公送我入院，咁我就放心了）

胃口依然麻麻，仲係食唔到有豉油既野，用豉油醃肉都唔得，聞到滷水更會即時反胃兼頭痛。真係唔知陀住個咪怪b，咁唔鐘意豉油都有既？！話晒都係中國人（香港人），食唔到豉油真係好麻煩，自己煮飯就只好用魚露代替，或者只係用鹽同胡椒粉，另外再研究下其他國家既食譜。家陣唔洗返工，得閒睇下《都市閒情》，宋芝玲教煮韓國野就啱晒我。如果出街食野就睇下攞唔攞到醋，有醋就食到多d，甜甜酸酸、煎炸、唔好太咸既野都ok，又或者盡量唔食中餐囉。

6月18日係東區驗唐氏，要抽血同照頸皮，之前上網睇過，如果頸皮厚度超過3mm就高危，bb照到係1.58mm，可以放心點，再抽埋血驗confirm，不過政府就係咁，兩星期內無打返電話俾你即係無事，所以只有等。。。

老公唔係香港，我又不宜走動，點算？！

係醫院，其實唔係好瞓得著，好掛住自己張床同屋企隻Melody，成晚行雷，又落大雨，Melody自己一個係屋企一定好驚(´･_･`)

係醫院既時候，每次去廁所都好驚，好驚又見到血，不過唔去又驚會迫親個子宮，迫親小b。所以每次都心呼吸，之後諗：「至少呢度係醫院，有叫人鐘，有咩事都會即刻有人處理。」可幸既係，每次小便都唔再見到紅色/啡色。

東區既醫生叫我如果有私家開既安胎藥同塞藥可以照用，因為無證據顯示係有用，所以政府唔會有呢d藥，但係我覺得係有d用囉。（再一次讚下自己，真係好醒，識得帶埋d藥去急症 =P）

第二朝早，發夢夢見老公同兩個o靚模係酒吧玩得好happy，嬲醒咗，跟住個肚抽住，我個心跳得好快，個肚就跟住抽，摸到佢振下振下，又覺得下面有d野頂住，小b好似想出嚟咁，好驚。清醒d之後，我知道老公唔好o靚模，所以我同小b話：「無野架，發夢ja，爸爸唔會咁對媽媽架」，跟住佢就平靜返d，第一次覺得佢個心好似同我個心係連住咁。

一直唔敢起床，直至個肚真係平靜晒，而我又真係夠鐘塞藥了，去廁所，又係好有心理壓力，因為之前次次都係晨早第一篤尿時見啡/紅的，朝早個肚仲激到咁，真係好擔心，但始終係要面對既，好在，最終一滴啡/血都無，好清。

醫生嚟巡房，問我仲有無流血，我有諗過話有，等我可以係度住多晚（政府醫院，$100/日，包3餐，真係好抵），但如果佢check我M巾就會知我講大話，同埋諗真都係想返屋企，如實講好過，醫生話走得既話，咪走囉。

之前約咗9：30am做第一次產檢，同姑娘講咗，佢地好好咁話要用輪椅推我去，因為產檢係另一面，好遠下，我唔適宜行咁遠，太好了，唔洗自己有排搵 o(^▽^)o 我問推我去個姐姐，我係咪好攪笑，要人係醫院度推去產檢，姐姐話唔係呀，間唔時都有架。係產檢等緊既時候，我周圍望下仲有無第二個人同我一樣著住醫院衫，但無囉。

老公唔係香港，我又不宜走動，琴晚家姐嚟醫院探我，商量過之後都覺得阿媽唔係照顧我既好人選，我去阿媽度住，有咩事，o個邊d急症又可能長龍過東區，我有好多朋友住附近，不過家姐覺得始終係親人好d，最終揀咗我表姐，同我住最近，生仔經驗又豐富，又同老爺奶奶住，有咩事可以即刻出嚟救我。同表姐講咗之後，佢都好樂意，就算要返工，都仲係都話要接我出院，好感動。

其他朋友們都好熱心，輪住嚟煮飯我食、買飯我食、幫我去買野，真係非常非常感激。我家陣真係唔敢再曳啦，唔想老公擔心，又唔想麻煩到人，仲要無得出街先最慘。。。

第10週、今次流紅兼有血塊 （＞～＜）

今朝大概7點半，忽然好急尿，去到廁所覺得個肚谷住，好難痾得出咁，終於痾到，發現見紅。呀！又流？今次仲要係紅色，仲有少少血塊，大大鑊！！！

老公琴日已經飛咗去加拿大（注），唯有自己入東區醫院，醫生建議留院一晚觀察，無再繼續流先可以返屋企抖。

我一早都心知不妙，可能隨時要入院，老公唔係香港，只可以自己顧自己，所以出門口時已經帶定晒野，日用品、毛巾、大量紙巾、濕紙巾、口罩、褸、陳醫生開既安胎藥、塞藥、charger、headphone，著埋Crocs鞋，仲帶埋melody陪我。（入咗院之後發覺原來仲要自己帶M巾。）

其實東區d醫生姑娘都幾好，個個都好溫柔。

今次幫我做急症分流個姑娘，一聽到我留血，應該仲滴緊，即刻就俾張輪椅我坐。

之後個醫生仔又係好溫柔，一嚟到就叫我唔洗擔心，幫我照下，仲靜雞雞送咗張B超相俾我。

入院登記個姑娘又問我食咗早餐未，我話未，佢就話幫我叫早餐。

安頓好之後，我打俾身在加拿大既老公匯報，俾佢話我梗係周圍走啦，加上自己又真係有d擔心會無咗，所以終於忍唔住喊咗，巡房個醫生咁啱嚟到見到我咁，好溫柔咁問我：「咩事呀，擔心呀，一陣醫生幫你照下啦。」佢見到我咽哽緊既樣，知道我講唔到野架啦，就行咗去睇第二個病人。

同房既病人，唔係作小產就作早產，有未見肚就作小產既（即係我），個肚大到差不多5個月而作小產既亦有，姑娘遂個行埋去問幾時換過M巾，仲有無流血，d血紅色定啡色，同埋話要無再繼續流血先走得。

見咗醫生，佢話bb仲有心跳就無事架啦，佢話可能係個子宮以外或者輸卵管流出嚟既血，未必會影響個胎，只有係個胎繼續發育唔到先會流產。希望真係無事啦 (._.)

【注：點解老公會係呢個時候飛咗，仲要飛3星期？】

事原大姑奶係加拿大撞咗車，撞親個頭，手術後係醫院昏迷咗一星期（家陣醒返，認得人啦），老公覺得佢過到去都無咩幫到手，只可以睇住大姑奶瞓，奶奶同係個邊既姑姐都唔洗返工，可以照顧大姑奶，所以想留係度陪我到夠3個月先過去。可惜，奶奶同姑姐係咁叫老公快d過去探大姑奶，於是好不情願地話咗俾奶奶同姑姐知，因為我有咗，未夠3個月唔行得開住。以為佢地會諒解，點知都係無分別。奶奶同姑姐各生了3件，可能佢地無我咁老先生，又唔洗做野，所以佢地唔明點解老公需要陪住我，唔知頭3個月係會隨時作小產。最後，依然叫老公快d過去，咁無辦法啦，早去早回囉。我就，自己執生啦 =_=

第9週、流啡

我原本今日1st day開工，點知準備起身梳洗返工既時候，見到流啡，同老公商量過後，佢一句「人命嚟架」，最終決定唔返工。唉，點解會咁論盡架。。。

發現既時候係8:10am，陳醫生有排都未開門，問咗個fd，佢叫我去東區醫院睇急症，因為萬一有咩事，最終又係要去醫院，咁不如直接去東區醫院仲方便。

即刻食咗陳醫生開落既安胎藥，塞咗藥，抖一抖等個肚無咁痛（有少少抽抽地咁痛），send埋email同agent話返唔到工，就啓程去東區了。

好快就有得見個分流姑娘，同姑娘講咗話有咗bb、9週、流啡、第一胎，之後就被評估為「緊急」了。老公多口同分流個姑娘話原本約咗6月9日做第一次檢查，個姑娘好cool咁話：「家陣都無關係啦，你都流啡咯」，好衰囉（￣^￣）

雖然係「緊急」，都等咗大概半個鐘。等既時候上網search過，又問過朋友，原來好多人都試過流啡，只要bb仲有心跳，流出嚟既係啡色唔係紅色，無一舊紅色野，就應該無問題。

醫生同我照肚皮超聲波，見到bb，比我之前見既大咗好多，仲已經成個頭形出晒，我仲見到佢對手tim ah ^_^，不過關鍵係仲有無心跳呢？醫生照到有，佢話閃閃下個點就係心臟囉喎，但其實我睇唔到。醫生好有心機咁幫我照，之後佢應該轉咗用第2個mode，咁我就見到有點紅色，佢話紅色就係心臟，之後又好努力咁嘗試俾d心跳聲我聽，佢話因為呢部機係急救用，唔係婦科用，所以要聽bb既心跳係有d難度。醫生話我要係屋企瞓幾日床，問咗我有無返工，我答有，做文職，寫咗假紙俾我6月3-6日（我份新工係sick leave no pay的，所以佢寫咁多日俾我，我一d都唔覺得開心），之後再refer我聽日去做「早期妊娠評估」。

原來「早期妊娠評估」正常係政府唔同你做個喎。我去到急症話流啡，佢又無要我證明真係流，咁就refer我去做個評估，咁又so喎，不過未知要俾幾錢。。。

第8週、胃口好差

不經不覺就第8週了，上星期第一次照超聲波，見到有粒好似黃豆既野，陏陏地既，醫生話個粒就係bb囉喎，又俾咗d聲我聽，話係bb既心跳，唔知點解，我同老公都仲係半信半疑。。。

咁耐以嚟，我都無嘔、無暈，個胸又無特別脹，只係可以叫做挺咗少少（<(‵︿′)>不滿），無特別易攰，只係每日4、5點就會好眼瞓，但夜晚又成12點幾先瞓。所以真係唔係好信真係有咗。

其他反應叫做有少少，例如間唔時會有少少腰痛，但我覺得係因為自己瞓得太多（仲未有工返）。對嗅味特別靈敏，好容易聞到垃圾味同人地既臭屁味（=.='''''）

不過胃口變差係最大既反應。我而家成日無胃口食野，成日覺得d野好難食，食一啖就反胃，但之後又唔會肚餓。我個fd話佢初頭都係咁，但佢揾到自己食到既野，就係豬柳蛋漢堡，好方便，但我好似淨係食到叉燒飯、燒肉飯、海南雞飯、同埋生果同菜，好擔心咁攪法會唔夠營養。

早幾日同老公坐遊輪去到台灣，一見到佢地d滷水就反胃，就算係試食都食唔落，d乜腸乜腸、超大貢丸墨魚丸、酥炸大魷魚，全部食唔落，牛肉麵、小籠包、炸雞排、胡椒餅都係慢慢啃先啃得落，真掃興。遊輪上面既buffet，除咗炒米、粥、菜同生果，其他既例如雞、豬排、咖哩、咕咾肉、煎蛋火腿，通通都食唔落，而家諗起都仲反反地胃。。。

陳醫生好奇怪，上次照完之後無同我約下次幾時再照，淨係出咗信，叫我去政府登記咗先。琴朝fax咗張form去東區醫院，下午4點幾就覆返我了，約咗6月9日9:30am ^_^

透明質酸測試揀出好精子 提升胚胎着床率

陳億仕就係今次幫我做IVF既醫生啦，唔知我個case，佢有無用透明質酸測驗既技呢？等我下次見佢時問下先 ^_^

*****

《透明質酸測試揀出好精子 增人工受孕機會》蘋果日報 2014年5月8日

http://s.nextmedia.com/realtime/a.php?i=20140508&s=6996647&a=52456874

*****

兩日前流啡，真的成功了？無可能。。。

原本以為要等一日先出驗血報告，點知放低筒血兩個鐘度，姑娘就打嚟。我係咁同佢吹水話，點解咁快有結果架，唔係話聽日先有既咩，blah blah blah~~~ 死都唔肯同佢對身份証號碼，因為我心中有條數，唔想聽個結果。。。

無奈，水始終有吹完既一刻，姑娘亦唔會陪你玩咁耐，結果始終要面對。姑娘：「初步結果顯示，你今次係成功既。」我：「吓？！」我真係不敢相信喎，我上星期六流啡喎，除咗流啡，我仲病咗成個星期，連續晚晚咳，個胎無咳到出嚟咩？我放胎後兩日，仲食咗酸辣米線，辣得滯攪到肚瀉tim喎，無瀉到出嚟咩？又成日夜瞓，又無肥到，係咪真係堅架，有無驗錯架？！

不過姑娘話星期五要再抽多次血做比對，之後先可以完全確定。哦，即係未算好confirm啦。。。原本都諗緊好唔好同老公講，驚星期五翻驗時知道中空寶佢會好失望，但基於佢始終有權知個初步結果，我都係打咗俾佢。老公同我既反應一樣咁冷靜，大家都覺得係無可能bingo的。

我之後仲無聊到，打返去揾姑娘，話我呢幾日有食藥喎，咳水呀咁，會唔會對個結果有影響架（其實儍既都知咳水唔會影響個HCG讀數），咁姑娘都當然係話唔會啦，仲叫我如果睇出面既醫生，要同醫生話有咗bb，要開d孕婦食得既藥 (=.=)

仲係唔敢相信，覺得個化驗報告可能攪錯咗，唔係我既係第二個人既，所以我自己用驗孕再驗證下，結果係好快就出咗兩條線。真係好難相信喎，流啡個日，我諗住無中到，仲即刻打咗去book 做 laser facial。中咗？真的嗎？我同老公都仲係覺得無可能。。。

等開估。Bingo係天意，唔bingo都係天意。。。

好耐無update我個IVF進度，但話咁快，輸卵管切除手術已經做完，復元進度理想，胎亦都已經放咗啦^_^

同姑娘約好咗今日要返去抽血驗bingo，之前我仲好天真咁同姑娘話：「如果M到咗咪即係唔中囉，再唔係自己用棒棒驗咪知囉，驗到兩條線先嚟驗血啦。」姑娘個樣好愕然，之後淨係話一定要返嚟驗血，o well~~~

返到屋企諗諗下，佢俾咗3隻護子宮藥我食，又俾咗塞藥我塞，仲要係一日塞3次，其實咁既情況下，我都真係應該幾難自然嚟M。d藥又可能會影響棒棒既測試結果，所以，都可能真係要驗血先可作準。

正常情況之下，我應該上星期六嚟M，當日大概中午，我發現有少量啡色、疑似M的物體流出，跟老公匯報了，大家都好失望，不過，之後就一直無嚟M，又再無流啡，我就唯有繼續食藥、塞藥。無作M症狀，又無作孕既感覺（無胸脹、無肚谷），不過每次諗返兩日前流過啡，都無寄望架啦。。。

一陣就去醫生度驗血啦，結果聽日先知，平常心。Bingo係天意，唔bingo都係天意。。。

子宮積水怎麼辦？

今日Cycle day 15，要見醫生check子宮厚度，再計下邊日適宜放胎。

當醫生check子宮厚度的時候，發現到我的子宮有積水，係左邊，右邊無事。前年做了通輸卵管手術，應該係再塞返，所以有積水。醫生話，以佢經驗，兼曾經測試過將胚胎同d積水放埋一齊，d積水係可以好快便將胚胎殺死的，所以醫生建議先切/紮咗左邊輸卵管，咁子宮就唔會再有積水，下一個cycle先放胎，就唔怕積水殺胎。

諗起又要捱一刀，就好唔開心。。。

****

子宮積水是什麼原因造成的呢??

最佳解答-莉凌回答:

許多婦女曾經受到披衣菌或淋菌感染，這些細菌由外陰部進入到輸卵管後，造成輸卵管或腹膜發炎，輸卵管的尾部(繖部)因此粘黏阻塞，輸卵管所分泌的液體不能正常的流往腹腔而聚集在輸卵管，造成輸卵管積水水腫。這水量到達一定量就會往子宮腔方向移動，變成子宮腔內積水，子宮腔積水會影響所植入的胚胎著床。這是因為:（1）炎性的輸卵管液含有對胚胎有毒的物質，(2) 子宮腔積水使胚胎不能附著在子宮腔壁，即著床失敗，(3) 子宮腔積水有時會將植入的胚胎沖出體外。因此為了改善這種情形，必須將水腫病變的輸卵管切除，或是在輸卵管和子宮交接處做結紮，使輸卵管內的積水不會逆流至子宮腔內。過去曾經因輸卵管發炎而造成輸卵管阻塞的婦女朋友要特別注意，是否有伴隨著子宮腔積水。如果有，要在做試管嬰兒助孕之前，先解決這個問題，以免失敗。

*****

比較輸卵管結紮手術 vs 切除手術

http://www.ivftop.com.tw/ActNews.asp?newsid=132

http://www.chiang-ivf.com.tw/case-7.htm

最後一針完成了，下一步--抽卵。

Day11 10:30pm最後一針破卵針（Ovidrel）完成了，Day12可以休息一天，但零晨開始要禁食禁飲，準備Day13抽卵。總括今個谷卵療程，打了20針，肚皮瘀了兩撻，痛到爆 (（＞﹏＜）)

抽卵約咗10:30am做，麻醉師同醫生都好準時。又要捱一針落麻醉藥，好痛，覺得有少少呼吸困難，之後就暈了。。。

醒既時候大概11:30am，麻醉師同姑娘一直係度陪住我，一直都有儀器check住血壓同心跳，比起勝利，呢度真係周到得多。麻醉師見我醒咗，問我有無唔舒服，同一時間，姑娘就去叫老公入嚟陪我，之後她們便走了。休息到12pm，就起身準備離開。

問咗姑娘，今次抽到11粒（左7右4），醫生決定今個cycle唔放鮮胎，全雪。聽到之後我鬆了一口氣，因為可以休息下。另外，事關我已經辭咗職，直至離職前都唔可以請annual leave，要請假放胎確係有難度。

每日打3針？？？ ～＞＿＜～

今日又見陳醫生，照ultrasound，佢話d卵泡成熟進度唔錯，左邊有十數粒，右邊有5-6粒，但都要繼續打促卵針，不過Gonal-F可以減少少，但就要加埋打Menpour（自己溝粉的），但其實Gonal-F 225iu + Menpour 75iu，咪又即係打300iu，仲要每日捱多一針。。。

揾翻之前既記錄，原來我上次IVF只係打咗Gonal-F 225iu x 5 + Puregon 300iu x 1，total促卵藥 = 1425iu，家陣打Gonal-F 300iu x 4 + Gonal-F 225iu x 3 + Menpour 75iu x 3，total促卵藥 = 2100iu，比上次打多咁多，得唔得架？會唔會谷死我架？上次total 1425iu都已經谷到17粒，今次咁打法，容乜易谷成廿幾三十粒出嚟架，暈！

聽日開始，除咗要打兩支促卵針之外，仲要打抑卵針，我即時反應係：「吓？每日打3針？？？？？」，姑娘話係，仲話你之前未試過咩？無理由架。。。我之前真係未試過呢，上次IVF我一係打促卵，一係打抑卵，未試過一日打晒兩隻，仲要溝藥，諗起一日打3針，我真係想喊 ～＞＿＜～

為咗生b你可以去到幾盡？唉，another 8針，雖然好驚，但都要頂硬上！

講下呢間香港生殖醫學中心，暫時嚟講，我覺得佢俾既針藥既包裝，同我之前睇藍醫生好唔同，professional好多，攞針藥竟然有冰袋跟，Gonal-F支針個樣又堅咗好多，可能個針頭再細咗，打落去無以前咁痛。另外，呢度d姑娘態度都好好，無黑面，又個個都醒醒地咁，唔錯唔錯 ^_^

終於抽中了，IVF Round 2 -- START！

2014年2月11日11:47am，突如其來一個無來電顯示的電話，我接了。原來係東華學院個不育研究第三輪，我被抽中了，我用咗5分鐘時間，決定了參加。由於今日剛剛係我第二日經期，如果今日可以見到醫生，做抽血化驗同照超聲波，就唔洗等下一個Day2，姑娘好醒，渣渣淋幫我約咗12:30pm見醫生，呢件事真係嚟得好突然。。。

On the way 去醫生度既時候先有機會同老公商量，係咪真係參加東華個研究，事關其實我剛剛辭咗職，諗過不如襯未揾到工既時候，去台灣一轉做IVF，家陣如果參加東華，就唔去台灣gor lor wor。東華：平d、方便d、但成功機會可能低d，台灣：貴d、未開始plan、成功機會高d，應該點決擇呢？呢個難題，當然係留返我老公諗啦，最終決定--東華！

突然既事未完，就係原來今日就要開始打第一針Gonal-F！可能因為上一次IVF已經係年多前既事，我真係無expect今日就要開始打針，有少少接受唔到。。。

醫生幫我照超聲波，話我d排卵情況唔錯，左邊有7粒，右邊有6粒，不過開頭針藥照打300iu先，4日後再照，如果卵泡足夠就可能會減份量。另外，醫生再照唔到有子宮息肉，即係上次手術之後無再復發，太好了！！！

講返個研究先，我被抽中既係西醫組，唔洗食中藥，由陳億仕醫生幫我做IVF，consultation fee全免，化驗費有8折，針藥就要付全費，全程（包埋放胎）大概要洗5-6萬。

抽咗血驗AMH（抗苗勒管賀爾蒙），留咗小便，攞咗針藥，放低咗$8910。一個突如其來的電話，兩小時的決定，IVF Round 2 -- START！

全面比對23對染色體，挑選較健康的胚胎放入母體，可大大提高成孕率至50-60%

【人工受孕求助個案增兩成】

隨著準媽媽年紀愈來愈大，需要輔助生育療程，協助懷孕的不育夫婦亦不斷增加。最近更有方法，可以在胚胎植入母體前，對23對染色體全面比對，提高成孕機會。一切得來不易，PHOEBE結婚10年，起初兩胎分別流產及宮外孕，直至一年前，接受了試管嬰兒療程，成功誕下這個可愛的女孩。夫婦無避孕常規行房一年，也未能成孕便介定為不育，而香港每六對夫婦，便有一對不育，調查顯示2011年，約有1萬名女性接受輔助生育療程，比起2010年增加約20%。醫生解釋，女士年紀愈大，除了卵子的質素和數量會逐步下降，影響生育的婦科病亦會陸續出現。針對高齡或多次流產的孕婦，中大新近引進的胚胎植入前，全基因組檢測新技術，可以全面比對23對染色體，挑選較健康的胚胎放入母體，大大提高成孕率。‪

《至Fit男女》

https://m.facebook.com/story.php?story_fbid=608011619251877&id=435113873208320&_rdr

泰國被喻為「第二強試管王國」，技術僅次於美國。。。

見到呢則新聞，真係心思思想去泰國試下。。。

《深圳婦潮興赴泰做試管嬰兒》蘋果日報 2014年1月9日

「第二強試管王國」，以「第三代試管嬰兒技術」，聲稱在點是移植前可進行基因篩查，選擇性別、雙胞胎、多胞胎、排除遺傳病等，26日完事，10多萬元（人民幣）搞定。

全文：

http://s.nextmedia.com/apple/a.php?i=20140109&sec_id=15335&s=0&a=18584839

上網Research咗d有關泰國試管嬰兒既資料。

试管婴儿目前成功率一览

国家	成功率
美国	50%~65%
泰国	50%~60%
台灣	50%~60%（少數生殖中心）
香港	30%~40%
中国大陆	20%~30%

著名泰国试管婴儿医院

1.孕诚医学生殖中心 

2.泰国BNH医院 　　

3.BUMRUNGRAD 康民医院 　　

4.BIC BANGKOK IVF CENTER 曼谷试管婴儿中心

5.泰国曼谷安全生殖中心（sfc）

泰国试管婴儿 - 泰国试管流程

赴泰前，在国内需做的准备：
1、	检查身体，女方到妇产科检查，查看自己是否适合做试管婴儿。
2、	夫妻双方办理好赴泰国的签证。
到达泰国之后，需要做的检查：
1、	在女方月经来潮的第一天飞往泰国，男方要是没有时间，可以等到取卵之日再来。
2、	到达泰国之后，在月经来潮的第2、3天，按照预约时间女方见医生，当日女方需要做的检查有抽血验6项性激素，B超检查卵巢和查看基础卵泡，检查合格之后确定进入疗程主治医师按照卵巢功能和性激素指标来用促排卵针药。
3、	第6天，在注射促排卵针第5天的时候，按照预约进行性激素检查和检查子宫和卵巢B超监测卵泡，查看药物对卵泡的效果，是否需要调整药物和调整剂量，继续注射促排卵针。
4、	第9天，在女方已经注射促排卵针8天的时候，再次进行性激素检查和检查子宫和卵巢B超监测卵泡，卵泡规格不均匀的情况下需要注射保卵，避免卵泡提前破裂。大部分的卵泡规格在1.6cm以上 可以注射HCG针 一般安排HCG针是在晚上8：00。
5、	第10天，男方需飞往泰国，为第二天的取精做准备，这一天女方可以稍作消息。
6、	第11天，取精、取卵，HCG注射之后的34-36小时进行取卵手术。取卵手术需要全麻，和空腹，取卵在B超引导下进行。取卵当日男方取精液，精液分离筛选之后进行ICSI卵胞浆内单精子注射，使其受精。
7、	第12天，取卵之后第1天，实验室将通知受精情况，您将知道有几个胚胎，同时每天用黄体支持的药物。
8、	第14天，取卵之后的第三天，需要做PGD检查的夫妻，实验室将有报告通知，可以进行PGD的胚胎情况。
9、	第15天，对于做PGD的夫妻，实验室将通知胚胎PGD的结果。
10、	第16天，进行囊胚移植，囊胚移植需要憋小便，有助于子宫打开利于移植。移植不需要打麻醉。
11、	第26天，移植10天后，即可抽血验Bata HCG和孕酮。验孕之后需要用安胎药安胎。验孕后的可怀着宝宝回国。