好想龍年快d過！

睇返我個blog最近既心情公仔，好似好耐都無開心過了。其實又真係無咩值得開心，呢個龍年，好努力咁去achieve既野，一樣都achieve唔到，年尾流流，仲要一次過爆晒出嚟，我仲可以笑面迎人，已經覺得自己好叻。

呢個龍年，做過兩次手術，年頭通輸卵管，年尾割子宮息肉，以為年頭做過手術，應該可以當蔽災，點知原來未夠，年尾既手術前，再爆失b+失業過我嘆。

呢個龍年，做咗兩次iui，一次ivf，都係失敗失敗同失敗，真係好失敗。

呢個龍年，我仲失去了我親愛的大表姐，死於乳癌，享年39。跟大表姐感情很好，所以很傷心很痛。直到現在，依然是很傷心很痛。

希望上天要給我既考驗都完了，俾我安安靜靜同安安全全咁過埋個龍年，我承受唔到再失去其他野了。。。

失業了的第3-7天 – 好想搵返份工係ifc﹑入院割子宮息。

失業第3天，都係9點就已經自然醒咗，食完早餐就跟琴日個consultant既建議，執咗份cv，好在一年前已經想轉工，update過份cv俾d recruitment agents，所以都好快執完兼send埋俾個consultant幫我睇，另外，我已經send埋俾相熟agent，話咁快佢就約見我了。4pm去咗見agent，佢就話手頭上有份工啱我，係contract的，問我o5ok，對於一個失業既人嚟講，咩都ok ga la，轉個頭佢就call返我話arrange到interview啦，嘩，我真係無諗過咁快囉。

第4日，之前我係IFC2返工的，多咗幫襯樓下間Shisedo，所以佢地得閒就會free d service俾我，例如修眉﹑facial。失業前已經約好咗的免費修眉，失咗業，梗係要慳得就慳，就算要我gut返出中環，唔洗錢修眉，都一定要到啦。重回ifc，都無話太傷感既，只係畢竟係度出入咗6年，ifc又咁靚，真係好想搵返份工係ifc。

第5日，因為我住太古坊附近，而我之前亦都係太古坊返工的，所以就約咗個舊舊舊同事食lunch，之後行下太古城。

星期6&日，入院做割子宮息肉手術，又係被裁之前約好咗的，好在公司個medical俾我claim到3月中，所以都無蝕。

我另外的blog文：割子宮息肉

就係咁，第一個星期就過了。

 

割子宮息肉

今日入院割子宮息肉了，10am開始禁食，3點多已經係手術室出面等，當時已經好肚餓，手術前醫生問我有無咩想問，我第一時間問幾時可以食野，同埋要唔要戒口，醫生話係小手術，醒咗就可以食野，唔洗戒口。

麻醉師又循例問下我有無藥物敏感，之前有無試過全身麻醉，我話有，上年2月通輸卵管先麻醉過，我話今次可唔可以輕手d，我驚我越來越蠢，佢話女人蠢d可愛d喎，其實d麻醉師都幾有幽默感，但佢幫我麻醉時，duk得我好痛。。。

4pm入手術室，4:30已經攪掂兼醒了。手術完畢醫生攞咗d相同已經割了出來既息肉俾我睇，其實都真係幾大粒，有手指尾一節骨咁大，未有bb前，其實我地個子宮係好細架ja，所以就算得手指尾一節骨咁大，加上個位生得近中間，足以阻住1/3 - 半個子宮，真係會影響著床，醫生話割咗之後，雪胎就有大把位著床，應該唔會有問題囉喎。

返到病房姑娘話我要4小時後先可以食野，我話醫生話即刻食得架喎，姑娘話唔得，水都唔飲得，驚我會嘔，個肚係咁gulu gulu，又瞓唔著，真難捱。

6點多我決定唔理佢，飲咗啖水再食咗半個豬仔飽，無嘔喎。7點幾就同老公係醫院開餐，食飽飽，睇陣ipad，玩陣candy crush，9點幾就瞓。不過都唔係瞓得幾好，零晨4點幾有人大叫，攪到我醒咗之後都唔係好瞓得返。

失業了的第2天 – 搵career transition consultant，create Linkedin

失業第2天，可以自然醒，但未習慣唔洗返工，9點就已經醒了。公司話已經俾咗兩萬4一間career transition既公司，間公司既consultant會幫你重投職場，你去唔去都已經俾咗錢，你唔去，個兩萬4亦都唔會俾你，你要兩個月內搵呢間公司，如果唔係就無架啦。我呢個師奶仔，梗係唔會俾人白賺啦，所以食完早餐就打咗去約見。下午3點就去咗搵佢，佢俾咗本野我，係教你點寫cv同要點樣搵工，教你諗下自己嚟緊想搵咩工咁囉，都有d用既，不過唔值兩萬4囉。另外佢有6-8 partition位，你隨時可以上去坐，有自助水吧，有電腦，有printer俾你print野，我即時諗起當年sars，有好多男人驚俾老婆知道失咗業，所以要扮返工，有呢個地方，d男人就唔洗坐係公園或者快餐店度扮返工啦，都幾好喎。

唔好意思影人地個失業避難所，不過個避難corner大概係咁既樣，私隱度都幾高ga。

個consultant好巴閉架，話佢地幫過500+人，95%係3個月內搵到工，希望我唔會係個5%啦。另外，個consultant教話要create返個Linkedin account，好多公司既hr同agent係Linkedin獵頭gor wor，咁我又create返個啦。經Linkedin識咗個agent，係coffee shop見咗佢一次，佢說我減少少人工，大家為咗一千蚊拗咗好耐，最終我屈服了，但最後咪又係無咗聲氣。。。

繼ivf失敗後，連份工都無埋啦，天意！

唉，真係一不離二，繼ivf失敗後，連份工都無埋啦，天意！

半年一度裁員日，終於輪到我了。老細話公司restructure過之後，我個位redundant咗喎，是但啦，自從我做既野北移咗之後，我就預咗有今日，所以呢一兩年都只係努力造b，希望靠個肚頂住，等公司唔炒得，可惜，自己個肚唔生性，唉。。。

家陣真係亂晒陣腳，無得再claim pregnancy checkup，無得claim生仔，無晒產假。就算揾到工都要做滿9個月之後有先開始有得claim，所以真係唔知仲放唔放胎好，定hold住先？如果照放，又成功了，大住個肚邊有人請？

老公叫我專心放胎，攪掂個b先，但我又好擔心，萬一都係唔成功，咁就全軍覆沒了。失業又失b，雙失！老公又話不如排埋政府ivf，政府既婦產科診症時間係星期一至五9:00am-1pm & 2:00pm-5:30pm，真係唔洗返工既人先有時間去排架。

不過為咗唔好俾自己dump懶個身，我都係決定即刻揾工，要同時間競賽，再睇下個天想我點。。。

失業了！

工作咗6年既公司﹙某美資銀行﹚，呢兩年嚟已經每半年裁員一次，今日1月21日﹙星期一﹚，終於輪到我了。因為老細坐我隔離，所以其實上星期都已經聽到d野，feel到d野，亦都知o個個將會係我，只係唔知邊日。

回想起當日被裁，10:30am俾老細call咗去conference room，個下真係諗住拎埋手袋去ga，因為如果係裁，公司係以即捕即解形式，收咗信就唔可以再返位，唔准自己執野架啦，但我又驚如果真係開會，俾其他同事見我攞住手袋，就真係會好樣衰lor，所以我只係攞咗電話﹑百達通﹑少少cash同著返件褸就去了。

係conference room門口裝一裝，見到老細同一個我唔識既人(HR)係房度，就知自己中了。第一時間係開心，好似中咗獎咁﹙事關真係賠得好好﹚，其實真係等咗好耐啦，始終公司每半年都裁一次，知道遲早到自己，趁出面個市未係咁差，公司又仲有能力賠足既時候，真係唔該俾我先啦~~ 不過之後就諗到我個b計劃，完了。

收信既前一分鐘，仲同個fd msn緊，所以一行出公司，第一時間whatsapp返個fd，通知佢我走了，佢當然好突然啦，之後先打俾老公﹙係呀，通知fd先到老公，嘻嘻﹚。當時大概11點，心情未平復，咁啱個日朝早心情好，打扮到好靚﹙可能係呢6年嚟打扮最靚既一次﹚，所以未想咁快返屋企，就去咗搵老公，老公公司係上環。之後又whatsapp我個teammate，話佢知「我走了，以後辛苦你啦」。佢問我得唔得閒出嚟食lunch，我咁啱無約人，就係咁，收信o個日就同咗幾個最fd既同事食咗farewell lunch。之後又去搵咗個fd，之前佢成日想我入股佢間café，家陣終於有錢在手，就去了解下自己適唔適合啦，不過最終都係覺得打工啱我d，創業實在太大壓力了！咁樣就過咗我失業既第一天。

我另外的blog文︰繼ivf失敗後，連份工都無埋啦，天意！

 

失敗原因

今日見醫生，主要問下點解唔成功，同安排一下割子宮息肉。

醫生話我比預期中早咗嚟m，即係ETs無著床過，原因有3︰
1﹚胚胎質數不佳，day2 grade A- 唔代表之後可以繼續生長，可否繼續生長，取決於卵子同精子質數，醫生話我既卵子無問題，但精子就依然係得1% good。
2﹚子宮問題，即係賴粒息肉啦，其實醫生一早都話我粒息肉唔細﹙超過1cm﹚，係會影響著床，不過可以的話，真係唔想捱多一刀，兼麻醉多一次，事關上年2月入院做通輸卵管手術，全身麻醉過一次，上個月抽卵又麻醉過，d人話每次麻醉完都會蠢咗ga，一年麻醉3次，就嚟蠢過隻豬啦。
3﹚唔記得，定佢無講，當原因不明啦。

上網搵到詳盡資料︰
探討屢次試管嬰兒著床失敗的原因及其治療

終告失敗了…>_<…

今朝見流啡，即刻打返公司請病假，諗住留係屋企卧床，睇下仲有無得救。如常塞了藥，抖咗一、兩個鐘，起身再check，無流啡了，只係流水。打去診所問，姑娘話好多人初期懷孕都會流啡，建議我用驗孕捧驗一驗再打俾佢，準備驗時便見紅了，同m一樣多，第一次ivf正式告吹。

ETs bye bye 了。。。

Day27再驗咗紅d綠d，應該失敗了。。。

應該失敗了。。。

今日day27再驗咗紅d綠d，紅d比前日仲淺咗，綠d依然白雪雪。紅d越來越淺，應該無機會了。

好唔捨得兩隻ET，醫生話佢地好靚ga，但最終都係嚟唔到呢個世界，bye bye啦o(︶︿︶)o  。雪BBs接力，加油啦！

有幾多ivf朋友會同屋企人講話自己做緊ivf既呢？

放胎請咗一星期假，今個星期返返工，蹱正要返早更，所以呢幾晚都瞓得唔好，朝朝6:15起身塞藥，之後抖40mins先正式起身梳洗返工，成日驚會唔知醒塞藥，攪到好多時4/5點就醒咗，一直瞓唔返，眼光光等塞藥，塞完藥反而瞓得返，可惜得40mins呢。回想起上星期放假，可以自然醒先塞，真係relax好多，不過終於捱到星期四啦，捱埋聽日可以有兩日等自然醒先塞，真好！

眼光光時又會諗下d無聊野，今朝諗起其實有幾多ivf朋友會同屋企人講話自己做緊ivf既呢？我同我老公都無，我無同阿媽講，事關阿媽係愛跟我唱反調的人，無同阿爸講，事關佢不嬲唔係好理我既野，家姐都無講，事關佢係好易會擔心我既人，老爺99呢d，我就一定唔會同佢地講啦，嘩，個新抱唔好生飬喎，容乜易佢叫阿仔休咗我ga，哈哈，講笑啫  ﹙好多老爺99覺得生唔到仔都係新抱既問題，我地呢有見識既，當然知道唔係啦﹚

另外，同事亦都係唔會講的，事關我公司得閒就裁員，俾公司d人知道，傳到我老細度，知道我想生仔又未成功，仲唔先炒咗我，等可以慳返d產假咩。所以生仔呢家野，係公司嚟講簡直係天大既秘密。每次d同事問我幾時生，我都要擺出一幅唔想生的面孔，都真係幾討厭﹙I mean討厭自己個扮野樣 ﹚。

今日day25，偷驗了。

 

上網睇到話排卵後9日，或預m期前7日可以偷驗，所以今日用紅d綠d偷驗了，紅d淺控，綠d白雪雪，唔知仲有無機呢？？照計日日塞藥，前兩日又打過支激黃胴針，紅d無理由仲係咁淺色，紅d淺控係咪黃體不足呢？會唔會真係太早驗呢？同埋…我d紅d綠d係過期ga, wakakakaka (expire Sep 2012)

醫生話1 月15日可以正式驗，如果唔成功就16日見到m小姐。咁15日我又再驗下啦。

話時話，上星期5開始已經無晒ohss反應，星期日仲唔知點解開始發冷﹙探咗睇下自己係咪發燒，但係得36.2度 -__-|||﹚，胃口好好，食完野個幾鐘又肚餓，易攰又唔覺，無谷m feel，覺得個胸脹咗少少，唔知係咪m小姐就來……

蝦仔你乖乖瞓落床 ♪(～0～)♪

月光光，照地堂，蝦仔你乖乖瞓落床 ♪(～0～)♪

琴晚沖涼時，諗起話得閑唱下歌仔，對bb發展有幫助，雖然我胎裡面o個個仲未成b，不過唱歌仔乃我強項，唱下無防。唔知點解，即時就哼咗「月光光」，哼到“蝦仔你乖乖瞓落床～”，簡直係我既心聲，家陣最擔心既係佢著唔著床。

琴日開始已經無咩ohss反應，只係個肚抽過一下，醫生話應該琴日著床，抽蛋個日開始已經日日食花膠同飲花膠湯，希望黐得實啦。。。

ohss反應，原來係有好過無

上網睇d人話有ohss反應原來係好過無，抽蛋後10日仲有ohss反應（late ohss），就有97%機會bingo。今朝上磅又輕了1 lb，又無咩唔舒服，仲擔心可能已經失敗了，抱著平常心食咗個包，飲咗杯奶，見仲肚餓就煮個麵tim，點知煮完個麵就嚟料，痛痛痛 {(>_<)}，忍住痛想食埋碗麵先（驚一陣淋咗唔好食呀嗎），但最終都頂唔順，食咗幾啖就爬返上床休息了。

不過個研究係話有late ohss既先有97% bingo，我呢d抽蛋未夠10日既ohss（early ohss），只係得41.5% bingo，所以唔可以開心住，睇下過多5日仲有無唔舒服先知。不過其實過多5日都已經可以偷驗啦。。。

去完覆診，醫生又開兩針俾我，話係幫助自製黃體胴的，打咗之後，肚谷情況會更嚴重(*_*)。好似有d低能，但都問咗醫生大小二便同打噴嚏會唔會chok咗對ET出嚟，佢好肯定咁答我話唔會，咁都放心d。另外，醫生話再陪育的胚胎，只有一粒成功，即總共有5粒雪b備用。

補充一句，ohss消失既時候，就係m來既時候，所以。。。ohss唔好離開我呀呀呀！！！

主題：【 早期和晚期的卵巢過度刺激症候群(OHSS)和懷孕的關係(2005/5/4) 】

---

    卵巢過度刺激症候群是不孕症患者接受不孕症治療時，卵巢對排卵藥物的反應過大，造成患者腹漲、嘔吐、腹水、肺積水、電解質不平衡、血栓、呼吸窘迫…等症狀。

　如果發生的時間在取卵後的九天內，稱為早期的卵巢過度刺激症候群(early OHSS)，而取卵後十天才發生則稱為晚期的卵巢過度刺激症候群(late OHSS)。

　一般不孕症醫師認為發生OHSS的患者八成是代表成功懷孕；比利時不孕症團隊把OHSS發生的時間分成早期和晚期，進一步分析比較兩者發生的原因和探討兩者的懷孕率，以作為醫師對患者諮詢及治療的依據。

　針對4376位接受試管嬰兒治療的患者進行研究，其中113人有OHSS的現象，細分之下發現有53人為早期的OHSS，其餘60人為晚期的OHSS，然後再進一步統計個別的懷孕率。

　研究結果顯示，早期的OHSS患者懷孕率為41.5%，比沒有OHSS的32.8%高，而晚期的OHSS的懷孕率可以高達百分之97以上；在流產率方面早期的OHSS三成以上會流產，而晚期的OHSS僅有百分之五會流產。

　為何會有這種現象﹖作者認為早期的OHSS可能是患者接受過多的HCG(一種安胎助孕的針劑)所造成，而晚期的OHSS，是因為懷孕造成體內自行分泌HCG進而過度刺激卵巢所致，症狀通常持續比較久也比較嚴重。

(摘譯自歐洲人類生殖雜誌2005年3月份)

---

放胎第三日，一朝早起身個肚勁痛 {(>_<)}

今日係兩隻ET既day4（抽蛋計day0），唔知佢地點呢？有無繼續分裂呢？定已經跌咗出嚟？成日都好驚會跌返出嚟，大小二便既時候都驚會痾埋出嚟，其實會唔會既呢？？呢幾日涷返好多，我d鼻敏感又來了，狂打噴嚏，真係好驚會chok咗佢地出嚟。見d人話唔可以浸浴，但又最好坐係度沖涼，我就放咗張櫈仔係浴江，坐係度沖涼，唔知係咪真係有用既呢？

呢幾日都係勁瞓、睇電視、去下supermarket、同煮下飯仔，琴日試過兩次個肚勁痛，食咗塊芝士同飲杯奶之後就舒服d，應該係ohss反應，聽聞食蛋白質食物可以舒緩。

一朝早起身又勁肚痛 {(>_<)}，右邊三角位痛，我撳到脹咗，一起身就痛，坐都痛，食咗塊芝士同飲咗杯蛋白shake，就爬返上床瞓，原本仲打算敷下mask，但真係痛到企多陣上mask都唔得，抖咗兩個鐘就好返好多了，三角位都無咁脹了。

打完晒d排卵針之後開始增磅，3日重咗6 lbs，非常擔心，都係個句啦，未有先增磅，唔得囉，今日再上磅，終於輕返4 lbs啦，但唔知係咪一件好事。。。