失業第5個星期 – farewell dinner, enjoy free beauty services

失業第5個星期，終於又有agent見下，嘩，個agent靚到呢，好似熊黛林咁高咁瘦，個樣我覺得靚過熊黛林tim，滿口純正英文，應該係abc，心諗咁靚既女，洗乜做呀，或者去做model好過啦，至於佢作為一個recruitment agent，就麻麻lor，一嚟唔算好熟個industry d野，二嚟之後佢都無搵過我lu，即係無job係手啦。

事關我同dept head一齊被裁，dept head做咗18年ga la，都幾好人ga，成日請我地去食好野，所以佢走，成班it同事就同佢攪咗個farewell，我就痴到有得一齊去鯉魚門被farewell。d同事仲準備咗張thank you card同禮物俾佢，多謝佢咁耐以嚟既照顧，surprisingly原來我都有card收，真係好感動，俾人裁都可以咁開心，真係裁多幾次都唔駒ga，哈哈！

唔想太過收埋自己係屋企，keep住搵d唔洗錢既野做下，過下日晨， 例如已經俾晒錢買course既修甲同facial咁，我個修甲course就嚟完，店主循例叫我續，我話失咗業呀，無錢買course，佢就真係放過我，我幫襯咗佢幾年ga la，真係人間有情。幫襯咗唔少既MTM﹙我係diamond member嚟ga﹚，又無啦啦free一次spa俾我喎，MTM不嬲都唔會push你買野的，所以我都好放心去試做，結果，當然係一蚊都無洗過就走到啦，其實佢地個spa真係超正，有能力既話我都想得閒去下。

IVF Round 1.2，START!

上個月做完割子宮息肉手術，因為未放胎，可以零避忌好happy咁過咗個農曆新年，sushi、雪糕、芋頭糕、蘿蔔糕、咖啡、啤酒，全部都放入口，跑跑跳跳、打通宵麻雀，咩都做齊，真係好耐無試過咁開心。

開心過後就重回做b路，今個cycle遲咗4日，原本都幾擔心，所以今日見醫生就問下，醫生話做完手術影響咗個週期都唔出奇，咁我都放心d，醫生仲話今次用natural cycle放雪b，唔洗食藥，又唔洗打針，day11返去照排卵情況，之後再計下邊日放胎就得，實在太好了！

蛇年一到，年初一已經食咗鋪13么，同埋自摸咗好多鋪，好好運呀！希望好運繼續嚟啦 ^_^

失業第2-4個星期 – 0 job post，唯有準備過新年，我唔靠男人架。

失業第2個星期，有agent見，有工見﹙不過唔係好啱﹚，又有返去見個consultant，日日都有係jobsdb”襟”job applications，每日都襟十幾廿份，其實都幾忙ga。都仲係未慣無工返，每日差不多9:30am就自然醒了，係呀，9:30am呀，比上星期遲了 

第3星期，開始越瞓越晏，10點先自然醒，就算醒咗都繼續攤係床。無工見，無agent見，事關就嚟農曆新年，連jobsdb既job post都無乜，只好約下fd食飯﹑去下facial同理髮，但係，個心開始有d焦急了，雖然有舊錢搣下，但真係好驚要搣一世。。。

無工搵，做下d無聊野啦，就係呢個星期，我創立咗個fans page，見到有咩筍野就會post上facebook，希望大家都可以慳多d錢，尤其係我呢d家陣要靠搣積蓄渡日既人。大家都支持下啦http://www.facebook.com/PigbunKitchen

第4星期亦都係好忙既一個星期，事關要拜年，我周圍同人講話我失業了，始終我係女人，又嫁咗人，所以個個都只會話「無所謂啦，等老公餋囉」，除咗我阿媽會話好擔心我。。。佢口個句話始終我有份工，老公就無咁大壓力，但我知佢心個句係想話，如果我自己搵唔到錢，萬一個老公又唔要你，點算﹖！阿媽，你放心，我係你生出嚟架嗎，由細到大你都教我唔好靠男人，你心個句，我聽到的。

就係咁，又過咗一個月了。

Book咗東區婦產科同家計會

見仲未搵到工，d時間flexible d，Book咗東區婦產科同家計會，萬一放埋兩次雪b都唔成功﹙而我又未搵到工﹚，就再試下政府ivf，政府ivf有年齡上限，如排隊見到醫生時已到40 歲就唔會幫你做。反正得閒，咪試下囉，話晒交咗咁多年稅，享用返d福利都要啦。新年前打去book，東區醫院book到4月2日﹙星期二﹚10:30am，家計會就book到4月26日﹙星期五﹚8:30am。好在唔洗返工啫，如果唔係真係要請一日假先得。

Book東區醫院婦產科真係要過5關6斬將，首先去睇家庭醫生寫張轉介信，之後我地某個星期6早上去咗東區醫院，以為可以即刻有醫生睇，點知原來婦產科只開星期一至五9am-1pm & 2pm-5:30pm，咁就白行了一趟。東區個reception俾咗張紙仔我，寫咗個查詢電話，打咗幾日都唔通。終於通了就叫我fax醫生信同寫低電話fax過去，朝早fax過去，下午就有人打俾我話漏咗無fax 身份証同住址証明，當時我係街，所以第2朝先再fax過。之後等咗5日都無人打返俾我，我咪打去追，跟住東區d人就話：「收唔到喎，無喎，真係無喎」，你話係咪火滾。無計啦，咪又fax過囉，之後又打嚟話個身份証唔清喎，真係暈了。成份野重新fax過，之後個日就收到電話confirm booking了。

家計會個電話又係打極打唔通，不過一旦打通就即刻confirm到booking。佢同我話記住帶錢，醫生費300，另外女方要驗血，大概千幾蚊，嘩，乜同睇私家差不多錢既，咁我做乜要睇佢呢，仲要晨咁早，我感覺上8:30去到都係等等等ja wor，真係唔係好想去。。。

Anyways，希望雪Bs攪得掂，或者排到政府時我未到40啦！

以為d親戚已經問到口臭，點知原來仲未問夠。

其實都問咗我3年啦，有就有，無就無架啦，我知我知，全部表姊妹都生晒，係我未有呀嗎，我都唔想架，已經做埋ivf，都唔成功，仲無得靠個肚頂住份工，我已經好down架啦，想我點呀？

男家：老公3個表妹，全部婚後兩年内有咗，一兔一龍一蛇，佢表姐，已經有兩件，最大個件9歲，另一件7歲，再添一兔一龍，佢哥哥家姐各有一件，以為咁熱鬧，大家今年focus係d新生兒度，唔好攪我啦，點知佢個唔通氣既大伯娘，用好嚴厲既口吻叫我快d生返個，好似This is an order咁，我老公咁啱行開咗，我真係即時有d想喊囉，唔係我唔想生，唔係我無努力過呀，大伯娘。。。 (Ｔ＿Ｔ)

女家：感覺良好好多，我家姐有一件，堂妹今年又添一件，五叔婆永遠咁明事理，又好記性，佢只係問下幾時到我整返件，仲話如果呢一兩年再唔生就唔好生啦﹙佢應該仲記得我幾多歲﹚，其實我都係咁諗。。。4姨就問我有無睇過醫生，我話有，驗咗我同老公都有問題，要比人努力十倍先得，然後佢笑了。2表姐又剛剛公佈有咗，第三件了，佢話係意外喎，點解我無意外既？唔緊要啦，咁佢生埋我個份囉。

朋友：5 pair 人攪聚會，3 pair 各有一件，1 pair 結婚3個月，我就俾兩個媽媽問我進度如何，我話難囉，你地d老公全部肯為咗做b戒煙，我老公堅持唔戒，仲經常飲啤酒，佢話好多人食煙飲酒都生得出啦，所以佢唔信，醫生既說話佢唔信，醫學報告都唔信，我真係無辦法囉，只可以隨緣。其中一個媽媽都係求車公得子的，所以今年初3，我都去咗拜下，希望有用啦！

洗洗洗，洗走衰氣迎蛇年！

琴日途經鵝頸橋街市，見到有碌抽葉賣，諗諗下，買嚟沖走龍年既衰氣都好喎，於是就買咗兩扎（$5/扎），同老公一人一扎。

上網睇過，最好煲一煲d碌抽葉，之後用d碌抽葉水抹身，頭、面、身、下體、腳趾都要抹，咁就包保衰氣走晒。沖涼時間為年廿九至年初一子時（子時：23時至01時）之間。

另外，係bk見到有jm話擺風水陣催b work喎，放大葉植物（如萬年青）係屋企既東面旺生女，東南面就旺生仔，我屋企係鑽石形，東面同東南面都缺半角，唔怪得咁難有啦。。。

祝大家蛇年行好運，齊齊bingo *\(^o^)/*

風水佈局生BB??