兩個月前，離開了謹做了兩個月的英國公司，當時，是因為有等於無既醫療津貼，及覺得佢地可能好快就唔需要我，所以當有銀行肯請，醫療福利包我&老公，仲係人生第一次帶team，我就扑到accept offer了，雖然accept前有點不祥既預感，但抱著“應該無得輸”同埋“大不了再轉”既心態，最終都係accept了。
第一日返工，見到自己個位得個窿（一個大約得3呎×3呎既位），都已經想立刻轉身走，但諗到走咗就前路茫茫，心諗“有糧出就算啦，人地俾咁多錢你坐窿就坐窿啦”，跟住就坐底了。第一日返工，就已經知道其中一個小朋友明天last day... 第二日返工，就收到另一個小朋友的辭職信，天啊，呢間咩公司嚟架？最大鑊係，封辭職信有grammar mistake ga!!! 大佬，上網大把template可以抄，點解可以犯d咁低等既錯，仲要係d咁低質素既人，都離棄呢間公司呀！同日再要幫手interview請人。返咗兩日工，已經試晒我10年都無做過既野，feel到好唔對路，所以即刻揾工。
Keep住都有d recruitment agent打電話嚟吹水，可惜都係無米粥，主要係人工俾唔到，同埋只係請contract，medical就算有都唔包老公，annual leave又少，所以真係好無奈 (u_u)
無奈無奈地做了兩個月，雖然請返d似樣d既小朋友，可惜我越來越覺得我個上司唔對路，佢同我處事既方向好唔同，始終佢做開中資銀行，喜歡人早返工（係早，唔係準時就得 -_-;），早返工+肯埋堆=做得野，而我係美資銀行出身，喜歡result oriented，做野從來都係對事唔對人。跟上司既處事方向咁分歧，可以點呢？
