原本以為要等一日先出驗血報告，點知放低筒血兩個鐘度，姑娘就打嚟。我係咁同佢吹水話，點解咁快有結果架，唔係話聽日先有既咩，blah blah blah~~~ 死都唔肯同佢對身份証號碼，因為我心中有條數，唔想聽個結果。。。
無奈，水始終有吹完既一刻，姑娘亦唔會陪你玩咁耐，結果始終要面對。姑娘：「初步結果顯示，你今次係成功既。」我：「吓？！」我真係不敢相信喎，我上星期六流啡喎，除咗流啡，我仲病咗成個星期，連續晚晚咳，個胎無咳到出嚟咩？我放胎後兩日，仲食咗酸辣米線，辣得滯攪到肚瀉tim喎，無瀉到出嚟咩？又成日夜瞓，又無肥到，係咪真係堅架，有無驗錯架？！
不過姑娘話星期五要再抽多次血做比對，之後先可以完全確定。哦，即係未算好confirm啦。。。原本都諗緊好唔好同老公講，驚星期五翻驗時知道中空寶佢會好失望，但基於佢始終有權知個初步結果，我都係打咗俾佢。老公同我既反應一樣咁冷靜，大家都覺得係無可能bingo的。
我之後仲無聊到，打返去揾姑娘，話我呢幾日有食藥喎，咳水呀咁，會唔會對個結果有影響架（其實儍既都知咳水唔會影響個HCG讀數），咁姑娘都當然係話唔會啦，仲叫我如果睇出面既醫生，要同醫生話有咗bb，要開d孕婦食得既藥 (=.=)
仲係唔敢相信，覺得個化驗報告可能攪錯咗，唔係我既係第二個人既，所以我自己用驗孕再驗證下，結果係好快就出咗兩條線。真係好難相信喎，流啡個日，我諗住無中到，仲即刻打咗去book 做 laser facial。中咗？真的嗎？我同老公都仲係覺得無可能。。。
咁即是點？最後結果bingo？
回覆刪除第二次驗血結果證實真的bingo了，但我同老公都仲係唔係好相信。。。
刪除嘩，恭喜曬，好替你開心，一切小心啲呀！
刪除好開心聽到又有人bingo, 希望你同bb 健健康康.
回覆刪除唔知幾時先可以輪到我呢~ 係呢, 我想問下你之前係咪都有填水? 之後冇左? 因為我上次放胎時都有個8cm既水囊, 上次失敗我估計係咪lee個應該係填水, 所以我到而家都唔敢再放胎, 如果下個月再check仲係度, 咁就又要做多次手術, 但真係好唔想. 所以想知道係咪如果有填水成功機會好低.
我之前係有子宮積水，係因為右邊輸卵管閉塞，同你既情況唔一樣，不過我個醫生話，子宮既積水係有百分之95既機會殺死個胎，我唔想搏5%既成功機會，所以我決定再一次做輸卵管手術。
刪除其實第二次做相同既手術，心理壓力係少好多的，亦都可能因為今次個醫生手勢好，所以今次手術之後，好快就捱得過，我手術後兩個星期已經可以同fd出外食飯，比起上一次，我要成個月先叫做好返晒。
所以，如果你真係需要再做手術，我覺得都應該做，bingo咗之後，你就會覺得一切都係值得的，加油！ ^_^
手術亦係由陳醫生喺佢診所操刀？
刪除手術係陳醫生幫我係醫院操刀的，要全身麻醉，係個肚開3個孔，用微創技術做的，之後要瞓一晚醫院。
刪除