27-32週，懶懶懶 (_ _).｡o○

個人越來越懶，懶到blog都無寫，日日瞓到成11點先起身，早餐連午餐一次過食，之後3點幾又瞓晏覺+hea係張床度，懶到連約朋友食晏都懶，有時仲懶到晚飯都係老公放咗工返到屋企先開始煮，老公有時都睇唔過眼話我兩句，不過其實自己都頂自己唔順。

唔洗返工、唔洗做家務，只係間中煮下飯、洗下碗，對於我嚟講，呢d簡直係超級女皇既生活，不過女皇生活就只係剩返兩個月，我要好好珍惜。。。

Update返呢幾個星期做過d咩先：

27週，想來想去，去搵返林淑儀醫生，因為原來我個fd兩胎都係搵佢接生的，兩胎都順產，又任你揀邊間醫院，診所又就腳，諗住到我個肚鑼咁大既時候，復診都無咁辛苦，可惜，當佢知道我打算去政府生既時候，佢就問：「咁你今日嚟搵我想做咩？」我&老公答：「普通產檢，照下個b咁囉，順便睇下性別。」跟住林醫生就叫我瞓上床，好仔細咁同我照，頭、腳、手、噹噹、面、心、肺，感覺同我認識既林醫生好唔同（以前睇症睇得好急，問多兩句佢就趕我走），之後到照腎，佢話睇唔清，可能有事，叫我出去坐一陣再入嚟照過，咦？咁似我上個月照結構咁既？！開始有d不安，不安既係擔心阿b有事，但心諗上次照結構都無話有事，無理由而家有事架，另外不安既就係診金，照咗成半個鐘，仲要有得照多次，以我認識既林醫生，係唔會賣大包既，張單實大鑊。。。果然不出我所料，翻照阿b個腎無事，但張單就盛惠$2280，林醫生幫我照多次結構。。。老公好嬲，話佢呃錢 (•̀__•́)୨

30週，又要驗糖尿，今次有晒經驗，好輕鬆，無壓力。因為等待第二次抽血期間會播video，講下產前須知、入院程序、產後處理資料等等，所以今次叫埋老公嚟睇兼陪我。同上次一樣，有事先會有電話通知，星期一都無收到電話，又順利過一關 ^_^

31週開始，轉去西灣河健康院繼續產檢。原來係健康既媽媽&BB先會轉去健康院的，知道我同BB都健康，都幾安心。去到健康院，登記咗就去自助量血壓，第一次玩感覺幾得意，之後就去磅重同驗尿，有朋友覺得帶尿好麻煩，但我又覺得唔帶仲麻煩，事關要忍尿，又要即場去廁所，都幾費心同嘥時間，仲要俾姑娘“鵝”，叫你下次記住帶。我有次試過唔夠尿，攪到驗到有蛋白，要狂飲水，之後再驗過，都嘥咗半個至一個鐘，自此我都係帶定尿，唔洗煩。第一次去有個breifing，介紹下健康院係做咩，之後會有得見姑娘同醫生，醫生只係第一次先有得見，之後要視乎需要先有得見，不過就算有醫生見，都只係聽心跳，無得照超聲波，我覺得同見姑娘無咩分別，分別在於如果有唔舒服，可以問下佢意見，好似我對腳起咗一撻紅色，唔痕唔痛的，醫生話可以不理，生完先算，同一個問題問姑娘，佢就會叫我出去睇醫生（即健康院以外既普通科）囉。見完醫生就約下一次覆診，每兩星期一次，每次都係星期四，可以揀9am、10am或者11am，我揀咗10am。

21週，照結構

終於等到照結構的日子，開估BB究竟係囝定囡啦。之前陳醫生同莫醫生照完都話似係囝，d人又話陀囝會皮膚差，但我無喎，又話個肚形會尖d，但我又幾圓咁喎，所以真係估佢唔到。

好啦，10：30am 到東區啦。係主座登記完就上D7病房，巡例要驗尿同量血壓，之後就係等。之前幾次產檢都係等大約半個鐘，今次等咗45分鐘都無聲氣，之後聽到後面個準爸爸鬧話足足等咗兩個鐘，嘩，唔係嗎？兩個鐘，咁我咪仲有排等？！好在我食咗個豐富早餐，再買定咗個豬柳蛋漢堡先嚟啫，如果唔係咪餓屎？！最後大概11：55am 到我了，等咗差不多個半鐘。。。

醫生都好細心咁幫我照，初初都係照下頭骨、脊骨、大腿骨、小腿骨、手臂骨、手指、腳趾是否齊全，再照下有無兔唇，睇下鼻仔同眼仔，跟住我同老公已經急不及待問BB性別了，照咗好耐先照到，哈哈，見到噹噹啦，係囝呀 ≧▽≦ 

醫生繼續照肝、腎、肺，但因為BB扒咗係度，照唔清個心，醫生話一定要見到個心有4房先得，要我出去行15分鐘，等BB轉位先再試下照，出去行既時候已經成1pm，真係有d餓了，一路行一路叫BB快d轉身，等醫生照清楚晒，我先可以去食晏架。終於照到個心都正常，走得，走既時候已經差不多1：30pm了，攪咗成3粒鐘，真係好攰。。。

18週，BB展收鑊

8月1-4日係BB展，可惜小b只係得4個半月，仲要未知係囝定囡（但7成機會係囝），所以都無咩好買。不過聽閒會有好多禮品攞，我又一見到話有免費BB展入場券就登記，最終收到美贊辰送既兩張入場券，咁唔洗錢有得入場攞野就梗係去啦。我另外又登記咗美素佳兒講座（原本以為有入場券送，點知原來無，但都有禮品送，就係爛鬼tote bag一個），所以8月1日10：30am就到會展了。

第一日，晨早流流都唔算多人，不過d大牌子好似美贊辰、雀巢、牛欄牌、Pampers、荷花呢d有大禮送既，就打晒蛇餅，老公怕我會攰，全部唔准我排。

每買一張入場券（$25）會跟一本coupon book，入面有d券係攞禮品的，事關美贊辰的兩張入場券係送既，只跟一本coupon book，仲要唔知點解會無咗幾頁，所以收穫唔算豐富。老公話本coupon book可以買的，$15/本，有好多人買4本，咁就可以排一次隊，攞4份禮品，但我地最終都無買多幾本，因為唔係好知有咩好攞，費事攞埋一大推垃圾返屋企。

BB展有d騎呢攤位，好似賣咖啡機咁，我初初仲好雀躍咁走埋去問，以為佢地有孕婦飲得既咖啡賣，點知原來係無gor lor，淨係得老公有得試飲，我就試飲部打奶機打出嚟既奶，真攪笑 ╮(￣^￣)╭。另外仲攪笑既係鴻福堂，雖然我未係好見肚，亦有d人會以為我剛剛生完，但我行去鴻福堂個攤位，講明係想問薑醋券點賣，但成個攤位d人淨係叫我地買涼茶券，話家陣好抵，仲叫我地試飲，我即刻問係咪有咗都可以飲涼茶，問咗兩次，分別兩個職員都話可以攞，真係嚇屎我，係咪真係俾老細摔數摔到傻咗，孕婦可以飲涼茶都講得出，定我孤陋寡聞呢？

Anyways，最終咩都無買，淨係用咗$100，買咗個影BB 4D照既優惠，會幫BB影3張相俾我地留念（齋影相，唔會有人幫你睇下BB有無咩問題），另外攞咗4包濕紙巾、6條尿片、洗衣液、口水巾、手襪仔、沙巾、清潔棉、媽媽奶粉、等等，收穫麻麻啦 ^_^

順產 / 開刀？

今日去完St. Paul產檢，book咗莫仲威醫生，我覺得佢麻麻，有d hea，部機又照得唔係好清，埋單$455，平野即係平野。莫醫生建議我開刀，因為我年紀大，第一胎，仲要係人工的，好大幾會順唔到（大概意思係因為個b係用非自然方法得嚟既，會難d用到自然方法生出嚟）。我諗住睇埋林淑儀醫生，問多個意見，如果都係話開刀好d，就搵返陳億仕醫生。

同老公傾傾下，得出個結論，就係順產對個bb危險d，開刀就對個媽媽危險d，所以順產定開刀，唔多唔少取決於要囝定要乸。。。事關原來徐子淇咁後生都係開刀生的，d有錢人，梗係重視個孫多過個新袍啦。。。

咁我應該點呢？係咪應該為咗個b，受一條疤、同遲少少先叉燒飯、同遲少少先出街呢？

=======================

順產 VS剖腹生產 不艱難的抉擇

http://www.yes-parents.com/knowledge/article/T2/T2Y0A0011.yp

17週，驗糖尿

事關我媽媽有糖尿病，所以東區要我早d驗，更可能要驗兩次。

琴晚同一大班舊同事去咗鯉魚門食海鮮餐，知道今日要驗糖尿，所以我都好檢點，唔係食得好多，同無食蟹（孕婦大忌）。零晨12點開始禁食，只可飲清水。

個Booking係8:30am的，要先去繳費處登記，我8:20am去到，繳費處未開，事關我個fd話驗糖尿一定唔可以遲到，遲到佢會唔俾你驗，要再約過，所以我就好擔心，走去問入院登記既人，佢地話唔怕gor wor，叫我係度等繳費處8:30am開門，哦，咁得意。。。

繳費處準時8:30開門，好快就登記好，可以上D7，同時有好多準媽媽一齊上去。上到去放低張登記紙，等叫名，等抽血，大概9:30就到我飲糖水了，等既時候，見坐我前面個女仔（佢個樣真係好細）飲糖水飲到喊咁濟，另外有個準媽媽都飲到眼都紅晒，真係好擔心。

我個fd warn定我叫我唔好飲咁多水，如果唔係會好易嘔，一嘔就又要再飲過，所以我朝早飲咗半杯水之後就無再飲。到要飲糖水時，我係好口渴的，因為口渴，所以頭半杯飲得好容易，但之後驚飲得太快會嘔，所以停一停先再飲。當無咁口渴既時候，同埋唔知係咪d糖沉低，好似比較難捱，不過最終都完成到。

飲完之後覺得喉嚨乸乸地，又好飽，去咗廁所，兼用清水啷下個口，不過都係覺得個胃好脹，個喉嚨頂住，有d想嘔。我知自己係唔可以嘔架，就企下起身，等d糖水易d落隔。最終，個女仔真係嘔咗，見佢同姑娘講咗之後就走咗，我諗佢要再約時間嚟飲過啦，陰公！

等第二次抽血既期間，醫院會播d懷孕前後既video俾我地睇，教餵奶、教沖涼、教如何處理產後抑鬱、等等，都幾有用，等到11:15am，開始第二輪抽血，抽完血可以攞盒奶同餅乾，到我抽血時，姑娘問我有無食野，有無嘔，我話無（但其實真係有d想嘔），抽完血，攞咗奶同餅就急急腳走，因為我唔可以衰收尾，係醫院嘔架！搭的士返到屋企，終於可以對住個廁所，但最終嘔唔出，飲埋盒奶都嘔唔出，咁算啦 ╮(￣︶￣)╭

其實杯糖水都唔算好難飲，75g葡萄糖，大概開咗400ml水，東區醫院呢度用咖啡紙杯裝住d糖水，感覺幾好，可以幻想下自己飲緊咖啡咁，飲落就似唔涷既雪碧再甜少少咁。

化驗結果下午就會出，一如以往，有問題既媽媽先會收到電話通知，即日下午或之後既工作日（即星期一）都收唔到電話即係無事。

16週，個肚忽然震得好厲害

呢幾日都係瞓到朝早5、6點醒，會起身飲盒奶先再瞓，點知翻瞓一陣之後，個肚忽然震得好厲害，我成個人由腳到心口都俾佢震到，老公瞓隔離都feel到震，老公摸摸我個肚，話真係好震，有d驚bb會唔會係臍帶纏頸，抖唔到氣，所以震晒，但我又心諗，好似未聽過有bb 16週臍帶纏頸出事，震咗5-10分鐘先靜返落嚟。

Whatsapp問咗幾個朋友，都話唔痛無流血就無事，應該係bb係度轉身，咁就無理佢，過一陣，又陣咗一陣，之後又靜晒lu。

開刀定順產？私家定政府？12月定1月？

見完陳醫生，bb正常地長大，脊骨、腦骨、大腿骨都已經慢慢長出，可惜因為bb扒咗係度，未睇到性別，不過醫生話睇我個樣，佢估係仔。人地話陀仔既媽媽會醜咗，唔通我醜咗？ (>_<) 身體上係有點變化，甩好多頭髮，比之前甩多1至1.5倍，腳毛長得好快，唔抗拒睇波之除仲自己識醒起身睇世界盃，真係有d似係仔。

另外，係時候問問陳醫生接生價錢，醫生講到好明話唔想接順產，如果決定順產既話佢建議我去政府生，如果開刀，佢就只係去浸會，事關家陣無咗雙非，最遲可以7個月先book醫院，順產/開刀佢都係收$25000，醫院費另計，約$2-3.5萬。醫生仲話通常搵返佢接生既一定係佢既IVF成功個案，因為唔想臨尾有咩差池，會選擇開刀，收得你錢，佢亦都會好有心機聯返好個傷口。咁點好呢，係咪即係話順產風險高d？

舅父叮囑我除非俾唔起，如果唔係，一定要係私家生，佢對政府零信心。都係既，雖然東區d人係幾nice，但真係好young，個個都好似fresh grad咁，睇落資歷深d個d，個樣就好晦氣，都真係唔想咁辛苦得嚟既b臨尾香（前後洗咗成廿萬架嗎）。問過親戚朋友，有兩個fd同我老公表姐妹共8胎都係政府生，又唔見有事喎，不過政府最唔好就係每日只得兩小時探病囉，想見多老公一陣都唔得，老公想見多個b一陣又唔得。。。

咁順產定開刀好呢？事關預產期係1月1日，如果開刀就要早兩星期出世，即12月b，順產的話就可以搏元旦b（1月b），我阿嫂話12月b好難搵學校收，變相要冧一年，1月b就間間學校都搶住收。唉，好難決揀呀！！！

軟禁了自己在家13日，終於順利過渡12週(-｡-;

自從6月9日出院後，幸得家姐、表姐及朋友們幫助，幫我買餸、買飯、買生果、買麵包、買雜誌，我可以一直留係屋企，無落過街，如同軟禁在家一樣。因為家姐話佢有朋友試過3更半夜肚痛，痾到成床血，之後小產咗，所以我真係好驚。小產唔緊要，最驚攪到成床血，又得自己一個係屋企，好唔想麻煩到人地幫我清潔張床，所以我真係好乖好乖，唔敢落街，就算係屋企，都盡量坐係張轆轆櫈度，周圍轆，盡量唔企起身。

老公提早一星期返香港，老公返到嚟，我終於可以解禁，去商場行下食個Tea。（好儍的諗法：家陣就算3更半夜有咩事，都有老公送我入院，咁我就放心了）

胃口依然麻麻，仲係食唔到有豉油既野，用豉油醃肉都唔得，聞到滷水更會即時反胃兼頭痛。真係唔知陀住個咪怪b，咁唔鐘意豉油都有既？！話晒都係中國人（香港人），食唔到豉油真係好麻煩，自己煮飯就只好用魚露代替，或者只係用鹽同胡椒粉，另外再研究下其他國家既食譜。家陣唔洗返工，得閒睇下《都市閒情》，宋芝玲教煮韓國野就啱晒我。如果出街食野就睇下攞唔攞到醋，有醋就食到多d，甜甜酸酸、煎炸、唔好太咸既野都ok，又或者盡量唔食中餐囉。

6月18日係東區驗唐氏，要抽血同照頸皮，之前上網睇過，如果頸皮厚度超過3mm就高危，bb照到係1.58mm，可以放心點，再抽埋血驗confirm，不過政府就係咁，兩星期內無打返電話俾你即係無事，所以只有等。。。

老公唔係香港，我又不宜走動，點算？！

係醫院，其實唔係好瞓得著，好掛住自己張床同屋企隻Melody，成晚行雷，又落大雨，Melody自己一個係屋企一定好驚(´･_･`)

係醫院既時候，每次去廁所都好驚，好驚又見到血，不過唔去又驚會迫親個子宮，迫親小b。所以每次都心呼吸，之後諗：「至少呢度係醫院，有叫人鐘，有咩事都會即刻有人處理。」可幸既係，每次小便都唔再見到紅色/啡色。

東區既醫生叫我如果有私家開既安胎藥同塞藥可以照用，因為無證據顯示係有用，所以政府唔會有呢d藥，但係我覺得係有d用囉。（再一次讚下自己，真係好醒，識得帶埋d藥去急症 =P）

第二朝早，發夢夢見老公同兩個o靚模係酒吧玩得好happy，嬲醒咗，跟住個肚抽住，我個心跳得好快，個肚就跟住抽，摸到佢振下振下，又覺得下面有d野頂住，小b好似想出嚟咁，好驚。清醒d之後，我知道老公唔好o靚模，所以我同小b話：「無野架，發夢ja，爸爸唔會咁對媽媽架」，跟住佢就平靜返d，第一次覺得佢個心好似同我個心係連住咁。

一直唔敢起床，直至個肚真係平靜晒，而我又真係夠鐘塞藥了，去廁所，又係好有心理壓力，因為之前次次都係晨早第一篤尿時見啡/紅的，朝早個肚仲激到咁，真係好擔心，但始終係要面對既，好在，最終一滴啡/血都無，好清。

醫生嚟巡房，問我仲有無流血，我有諗過話有，等我可以係度住多晚（政府醫院，$100/日，包3餐，真係好抵），但如果佢check我M巾就會知我講大話，同埋諗真都係想返屋企，如實講好過，醫生話走得既話，咪走囉。

之前約咗9：30am做第一次產檢，同姑娘講咗，佢地好好咁話要用輪椅推我去，因為產檢係另一面，好遠下，我唔適宜行咁遠，太好了，唔洗自己有排搵 o(^▽^)o 我問推我去個姐姐，我係咪好攪笑，要人係醫院度推去產檢，姐姐話唔係呀，間唔時都有架。係產檢等緊既時候，我周圍望下仲有無第二個人同我一樣著住醫院衫，但無囉。

老公唔係香港，我又不宜走動，琴晚家姐嚟醫院探我，商量過之後都覺得阿媽唔係照顧我既好人選，我去阿媽度住，有咩事，o個邊d急症又可能長龍過東區，我有好多朋友住附近，不過家姐覺得始終係親人好d，最終揀咗我表姐，同我住最近，生仔經驗又豐富，又同老爺奶奶住，有咩事可以即刻出嚟救我。同表姐講咗之後，佢都好樂意，就算要返工，都仲係都話要接我出院，好感動。

其他朋友們都好熱心，輪住嚟煮飯我食、買飯我食、幫我去買野，真係非常非常感激。我家陣真係唔敢再曳啦，唔想老公擔心，又唔想麻煩到人，仲要無得出街先最慘。。。

第10週、今次流紅兼有血塊 （＞～＜）

今朝大概7點半，忽然好急尿，去到廁所覺得個肚谷住，好難痾得出咁，終於痾到，發現見紅。呀！又流？今次仲要係紅色，仲有少少血塊，大大鑊！！！

老公琴日已經飛咗去加拿大（注），唯有自己入東區醫院，醫生建議留院一晚觀察，無再繼續流先可以返屋企抖。

我一早都心知不妙，可能隨時要入院，老公唔係香港，只可以自己顧自己，所以出門口時已經帶定晒野，日用品、毛巾、大量紙巾、濕紙巾、口罩、褸、陳醫生開既安胎藥、塞藥、charger、headphone，著埋Crocs鞋，仲帶埋melody陪我。（入咗院之後發覺原來仲要自己帶M巾。）

其實東區d醫生姑娘都幾好，個個都好溫柔。

今次幫我做急症分流個姑娘，一聽到我留血，應該仲滴緊，即刻就俾張輪椅我坐。

之後個醫生仔又係好溫柔，一嚟到就叫我唔洗擔心，幫我照下，仲靜雞雞送咗張B超相俾我。

入院登記個姑娘又問我食咗早餐未，我話未，佢就話幫我叫早餐。

安頓好之後，我打俾身在加拿大既老公匯報，俾佢話我梗係周圍走啦，加上自己又真係有d擔心會無咗，所以終於忍唔住喊咗，巡房個醫生咁啱嚟到見到我咁，好溫柔咁問我：「咩事呀，擔心呀，一陣醫生幫你照下啦。」佢見到我咽哽緊既樣，知道我講唔到野架啦，就行咗去睇第二個病人。

同房既病人，唔係作小產就作早產，有未見肚就作小產既（即係我），個肚大到差不多5個月而作小產既亦有，姑娘遂個行埋去問幾時換過M巾，仲有無流血，d血紅色定啡色，同埋話要無再繼續流血先走得。

見咗醫生，佢話bb仲有心跳就無事架啦，佢話可能係個子宮以外或者輸卵管流出嚟既血，未必會影響個胎，只有係個胎繼續發育唔到先會流產。希望真係無事啦 (._.)

【注：點解老公會係呢個時候飛咗，仲要飛3星期？】

事原大姑奶係加拿大撞咗車，撞親個頭，手術後係醫院昏迷咗一星期（家陣醒返，認得人啦），老公覺得佢過到去都無咩幫到手，只可以睇住大姑奶瞓，奶奶同係個邊既姑姐都唔洗返工，可以照顧大姑奶，所以想留係度陪我到夠3個月先過去。可惜，奶奶同姑姐係咁叫老公快d過去探大姑奶，於是好不情願地話咗俾奶奶同姑姐知，因為我有咗，未夠3個月唔行得開住。以為佢地會諒解，點知都係無分別。奶奶同姑姐各生了3件，可能佢地無我咁老先生，又唔洗做野，所以佢地唔明點解老公需要陪住我，唔知頭3個月係會隨時作小產。最後，依然叫老公快d過去，咁無辦法啦，早去早回囉。我就，自己執生啦 =_=

第9週、流啡

我原本今日1st day開工，點知準備起身梳洗返工既時候，見到流啡，同老公商量過後，佢一句「人命嚟架」，最終決定唔返工。唉，點解會咁論盡架。。。

發現既時候係8:10am，陳醫生有排都未開門，問咗個fd，佢叫我去東區醫院睇急症，因為萬一有咩事，最終又係要去醫院，咁不如直接去東區醫院仲方便。

即刻食咗陳醫生開落既安胎藥，塞咗藥，抖一抖等個肚無咁痛（有少少抽抽地咁痛），send埋email同agent話返唔到工，就啓程去東區了。

好快就有得見個分流姑娘，同姑娘講咗話有咗bb、9週、流啡、第一胎，之後就被評估為「緊急」了。老公多口同分流個姑娘話原本約咗6月9日做第一次檢查，個姑娘好cool咁話：「家陣都無關係啦，你都流啡咯」，好衰囉（￣^￣）

雖然係「緊急」，都等咗大概半個鐘。等既時候上網search過，又問過朋友，原來好多人都試過流啡，只要bb仲有心跳，流出嚟既係啡色唔係紅色，無一舊紅色野，就應該無問題。

醫生同我照肚皮超聲波，見到bb，比我之前見既大咗好多，仲已經成個頭形出晒，我仲見到佢對手tim ah ^_^，不過關鍵係仲有無心跳呢？醫生照到有，佢話閃閃下個點就係心臟囉喎，但其實我睇唔到。醫生好有心機咁幫我照，之後佢應該轉咗用第2個mode，咁我就見到有點紅色，佢話紅色就係心臟，之後又好努力咁嘗試俾d心跳聲我聽，佢話因為呢部機係急救用，唔係婦科用，所以要聽bb既心跳係有d難度。醫生話我要係屋企瞓幾日床，問咗我有無返工，我答有，做文職，寫咗假紙俾我6月3-6日（我份新工係sick leave no pay的，所以佢寫咁多日俾我，我一d都唔覺得開心），之後再refer我聽日去做「早期妊娠評估」。

原來「早期妊娠評估」正常係政府唔同你做個喎。我去到急症話流啡，佢又無要我證明真係流，咁就refer我去做個評估，咁又so喎，不過未知要俾幾錢。。。

第8週、胃口好差

不經不覺就第8週了，上星期第一次照超聲波，見到有粒好似黃豆既野，陏陏地既，醫生話個粒就係bb囉喎，又俾咗d聲我聽，話係bb既心跳，唔知點解，我同老公都仲係半信半疑。。。

咁耐以嚟，我都無嘔、無暈，個胸又無特別脹，只係可以叫做挺咗少少（<(‵︿′)>不滿），無特別易攰，只係每日4、5點就會好眼瞓，但夜晚又成12點幾先瞓。所以真係唔係好信真係有咗。

其他反應叫做有少少，例如間唔時會有少少腰痛，但我覺得係因為自己瞓得太多（仲未有工返）。對嗅味特別靈敏，好容易聞到垃圾味同人地既臭屁味（=.='''''）

不過胃口變差係最大既反應。我而家成日無胃口食野，成日覺得d野好難食，食一啖就反胃，但之後又唔會肚餓。我個fd話佢初頭都係咁，但佢揾到自己食到既野，就係豬柳蛋漢堡，好方便，但我好似淨係食到叉燒飯、燒肉飯、海南雞飯、同埋生果同菜，好擔心咁攪法會唔夠營養。

早幾日同老公坐遊輪去到台灣，一見到佢地d滷水就反胃，就算係試食都食唔落，d乜腸乜腸、超大貢丸墨魚丸、酥炸大魷魚，全部食唔落，牛肉麵、小籠包、炸雞排、胡椒餅都係慢慢啃先啃得落，真掃興。遊輪上面既buffet，除咗炒米、粥、菜同生果，其他既例如雞、豬排、咖哩、咕咾肉、煎蛋火腿，通通都食唔落，而家諗起都仲反反地胃。。。

陳醫生好奇怪，上次照完之後無同我約下次幾時再照，淨係出咗信，叫我去政府登記咗先。琴朝fax咗張form去東區醫院，下午4點幾就覆返我了，約咗6月9日9:30am ^_^