1月2日 8:30pm 見紅 →住院day1（續）

係醫院真係好悶，隔離床個大6女人成日係度講電話，好嘈，對面床o個個又係度咳，諗諗下好想出院，無理由流分泌都要留院架嗎。醫生唔俾我出院既理由，係有人試過一行出醫院就穿水，如果真係咁靈，咁聽朝先出院都可能穿架喎，咁今晚穿好過聽朝穿啦，呢個理由完全無科學根據，但為咗阿B早日出嚟，我決定堅持出院 <(‵▽′)>

因為老公嚟到（探病時間6-8pm），6pm開始同姑娘講話要出院，一路都無聲氣，病房唔俾探病人仕係度食野，老公肚餓，我就催多次姑娘，姑娘話醫生未返，同姑娘講低我同老公落canteen食野，醫生返嚟call我mobile，但成8點都無聲氣，我叫老公走先，如果走得我自己走，都係搭的士啫，我又無事無幹，老公送返我上病房就走了，之後我想便便，點知一除褲就見到個護墊紅晒，即刻打俾老公匯報，但都要便便埋先可以出去同姑娘講。

同姑娘講咗，佢好震定喎，淨係叫我換衛生巾，之後等穿水等痛，又摸下我個肚話實咗，應該差不多。再寸下我問我仲要唔要出院，我話出得我都出架。

問咗個fd，佢見紅之後成1-2星期先生得，不過佢早見紅，最終edd+1生，我真係有d驚我會俾東區禁錮到生完先走得，慘！

之前未見紅時問過，如果堅持出院要簽免責，如果聽朝真係再無見紅，我一定簽，總好過係度瞓到1月8日催生，仲要每日得6-8pm先見到老公，又無電視睇，又無得行下街，真係悶爆。有諗過upgrade上半私家房，但由今日up到生完出院，分分鐘成10日，成2萬4喎，都係簽免責出院好過。