完成不了的心願，一點遺憾。。。

依我而家用100%等奇蹟既方針，其實自己心裡有數，知道中既機會等同中六合彩3獎，所以為咗唔想人地再問，我會同人地話「我唔生啦」，但實情係「我生唔到」。「生唔到」的確係無咩所謂，只係有點遺憾（︶︿︶）。。

遺憾係，我有4位好姊妹，兩位我睇住佢地結婚（其中一位個老公仲要係我介紹俾佢的），一位上年生了，一位都剛剛生了，另外兩位都剛剛報喜了（回想起，其實好似我係第一個打算生的）。當年，我地一齊交流下點計排卵日，應該邊日dodo，邊度有驗排卵棒特價，睇邊個中醫好，食d咩幫助懷孕，還有很多很多話題，但現在，開始越來越無共同話題了。。。當年，我仲有諗過係大家生晒之後，arrange幾pair人+b，一齊去studio影紗龍，可惜，呢件事而家應該無我份了。。。當年，我同其中3個姊妹一齊學日文，我地一齊去考試，一齊pass咗，之後一齊請missy去Marriot食buffet慶祝。點解，生b唔可以一齊pass？？

另一遺憾係，因為一些原因，老公同老爺反咗面多年，就算見到面，或者同枱食飯，老公都唔會叫佢一聲老豆（但老爺又確係幫唔落既），奶奶同大姑奶都因為呢樣野有d唔安落，作為新抱，我會幫老公叫聲老爺，除咗咁，就無野可以做，之前有諗過，如果生到個b，阿b就可以幫爸爸叫聲爺爺，同埋有個小朋友，應該容易d解開佢地兩父子個結，或者，個天覺得呢個結唔需要解啦。。。

琴晚，跟大伯的朋友一齊為大伯興祝生日，大伯的朋友們都結晒婚同生咗小朋友，大概3-4歲，大家係度高談闊論d小朋友返學既事，我同老公就只可以坐係度發夢，因為呢d話題完全唔關（或者唔知幾時先關）我地事。遺憾係，相信未來將會有更多機會，面對成枱爸媽，討論子女問題，而我同老公係完全加入唔到的，感覺被遺棄。。。

面對住成枱爸媽，我真係好唔明點解生b係咁難，人地個個都做到，偏偏得我做唔到？又話6對夫婦先有一對不育，點解偏偏要選中我呢對係不育？？好唔甘心，但又好無助 _(︶︿︶)_

又day1了。。。

決定唔生後的第一個day1，回想起上個月的day1，我哭了，之後同老公發了一大輪嚕穌，叫佢要生就揾第二個同佢生，最終大家都決定唔生就唔生囉，試過唔成功，已經叫做有了交代。一星期後，老公又忽然問我：「真係唔生呀？」我好堅定話「係」，但轉頭我又會繼續睇bk，睇下有無其他辦法，因為有點唔憤氣。有時老公又會無啦啦話，唔生都好既，無咁大壓力（事關佢最近生意唔好）。我地倆公婆就係咁，成日一時一樣  ╮(╯▽╰)╭

不過今個cycle，老公好勤力，排卵後5日內，dodo咗4次，見老公咁勤力，我都好希望上天可以獎勵返佢，可惜奇蹟尚未出現，而我亦都好平常心咁面對又一次的day1。

報告一下揾工情況先，4月11日終於簽咗employment contract，正式宣告我有人請啦，人工比之前個間多咗15%，5月13日先要上工，返工兩日就要飛倫敦training 11日（嘻嘻，我第一次去倫敦ja，老公會同我一齊去，走過浮華大地）。所以今次day1，我同老公話m來了，除咗唔洗驚生蛇b之外（其實我地真係好唔想要蛇b），仲校啱咗時間，分分鐘我地可以有個Made in London既baby，哈哈，老公就話：「吓，乜你仲有諗住生咩？」我無答，跟住一齊偷笑了，呢d就係我地既默契。
～（￣▽￣）o∀*∀o（￣▽￣）～

無論如何，我地都會欣然接受上天既安排，希望幸運早日來臨啦 ^_^

改善精子形態

好多人都知食煙、飲酒、飲可樂、飲咖啡、壓力、夜瞓、焗桑拿、癡肥等等，都會影響精子質素，但大家既老公又改唔到/唔肯改，做老婆既真係好無奈。不育科既西醫成日話精子質素差係無得救，所以做老婆既就只可以做多一點點又一點點咁樣去彌補，最終走上IVF呢條路，捱十幾廿針肚皮針、捱抽卵谷卵之痛、又塞藥、又噴鼻。。。最慘係做完咁多野都唔成功。唔成功，醫生就只會話係原因不明，但我覺得好大機會係因為精子質素唔好，所以個胎最終生長唔到，咁點算好呢？有幾個改善精子質素既方法，同大家分享下。

1）葉酸 - 係老公食葉酸喎

輯自頭條日報

~~~~~

精子外貌健康——即一個頭一條尾巴，才能令卵子受孕。陳勁芝指出，「葉酸」是組織精子細胞及脫氧核糖核酸（ＤＮＡ）的營養素，男士們每日應吸收約400微毫克份量。欠缺「葉酸」的男士，其精子細胞的基因會較為不正常及混亂，日後誕下的嬰兒亦較有機會患上基因疾病。○八年一項外國研究發現，八十九名男性中，吸收最多「葉酸」的，擁有最少外形不正常的精子，可見「葉酸」對精子發育非常重要。另外，必需的脂肪酸，例如亞麻酸及亞油酸，亦是製造精子細胞壁元素；更有研究指出攝取過多反式脂肪酸，受損的精子細胞會更多。

「要培育正常外形的精子，男士們不妨多吃深綠色蔬菜、乾豆類、全穀物食物及橙，來吸收足夠葉酸（每日400微克）；攝取橄欖油及魚油來取得優質脂肪酸。」陳說。

全文

How Folic Acid Affects Male Fertility

~~~~~

大家都知準備生bb既媽媽要食葉酸，但我個醫生話其實唔洗食，葉酸係可以幫助bb腦部發展，未有之前其實唔洗食，有咗先至開始要食，所以我已經停食了。家陣話原來老公更應該食，咁就食得唔好嘥，俾老公試下。

2）去泌尿科睇下有無睪丸靜脈曲張問題

輯自wikipps.hk

~~~~~

精索靜脈曲張 -病征

陰囊內的靜脈出現腫脹；情況多發生於左方睪丸一側，但亦可以發生右方一側，甚至同時出現於兩顆睪丸； 

陰囊外浮現出如蟲狀的血管分佈； 

睪丸部位出現間斷性的疼痛；但不適的感覺亦會因人而異； 

睪丸出現沉重的感覺； 

由於血液積聚於陰囊部分，致使陰囊內的溫度提高，影響精子的產生，有可能會導致不育； 

睪丸萎縮。

精索靜脈曲張 -引起男性不育的主要原因

1、精索靜脈內壓力增加，血液瘀滯，幹擾睪丸的新陳代謝;　　

2、睪丸溫度平均比正常升高;　　

3、睪丸分泌細胞受抑制而分泌睪酮下降;　　

4、左右睪丸靜脈叢互相交通，因此一側精索靜脈曲張往往造成兩側睪丸損害。　　

5、睪丸局部因靜脈血液回流障礙而缺氧，精子生長環境改變;　　

6、在精索內靜脈逆流的血中，毒性物質的影響可導致睪丸生精功能的障礙; 

精索靜脈曲張 -手術後效果評價

精索靜脈曲張治療後生育功能恢復的情況主要與睪丸損害可逆性的程度有關，而與原來靜脈曲張的程度並不一定平行。實行精索內靜脈高位結紮術治療，多數人效果較好，精液質量有不同程度改善，少數精液質量無改善者除與手術結紮靜脈不徹底和誤紮動脈有關外，主要還是原有的生精功能已受到不可逆性損害。據報道，手術結紮治療後半年至1年，精液質量有明顯改善者約占50％～85％，受孕率達30％～70％。因此為瞭提高靜索靜脈曲張的術後受孕率，選擇有經驗豐富的手術醫生顯得至關重要。因為在術前靜索靜脈曲張對睪丸生精的損害扣程度是無法改變的，而為瞭提高治愈率來選擇有經驗豐富的手術醫生是可變的。

全文

c6 丁丁差的姊妹請入（我覺得不育醫生不誠實） - 想生BB - 親子王國

香港衛生處 - 精索靜脈曲張

~~~~~

Bk既jm們話手術大概2-4萬，手術後自然bingo既機會有6成，相對ivf既成功機會只有3成，好似試得過喎，不過當然要睇咗泌尿科，睇下係咪有問題先啦。

3）戒可樂+早瞓兩星期

呢個係我朋友既經驗，佢老公原本形態得3%，準備做iui (simulate cycle)，醫生叫佢老公戒可樂+早瞓直至交丁，佢老公真係好乖咁戒咗可樂，同埋早瞓，交丁結果出嚟係正形態去到17%，嘩，真係不得了，結果朋友咪1 take過iui bingo咗囉，所以老公肯乖乖配合真係好緊要。不過朋友老公不嬲無食煙同飲酒既習慣，我老公都戒咗可樂好耐，亦都已經盡量早瞓，可能因為仲未戒到煙酒，所以我就尚未成功。

4）Morning Q

有位老前輩同我講，話朝早瞓醒時，d精係最靚最精靈既，所以morning q最好，如果平日要返工，就星期五/六晚早d瞓，第二朝一起身，牙都唔好擦就dodo，之後再瞓到自然醒。如果未有mood dodo，都可以去食個早餐，返嚟先dodo既，最緊要係relax。老前輩話佢已經用呢個方法生咗3個，佢細佬攪好耐都攪唔掂，之後都係用佢呢個方法攪掂。佢話呢個方法，完全唔洗計排卵期，總之逢星期六&日就morning q。我其實都試過，不過奇蹟仲未發生。。。不過我覺得呢個point都幾make sense，又可以作為一個籍口，要老公早d瞓同少d去夜浦 =P

5）有病時切忌dodo

老前輩又話，有病時切忌dodo（例如感冒），因為病人需要多d精力去對抗病菌，如果係呢個時候，你要佢分配d精力去dodo，咁佢個病就會好難好，同埋手尾長，d精亦都唔會靚，所以如果你/你老公病了，大家都係最好抖抖，等好返先攪喎。

我地為咗生b，已經做咗咁多野，做得既都做晒，係時候到老公們做返d野啦！！

試管嬰之父夢中辭世

法新社 via Yahoo! 香港新聞 - 4月11日 上午01:05
試管嬰兒之父的英國科學家愛德華茲，昨日在睡夢中逝世，享年八十七歲。全球首名試管女嬰，1978年在英國奧爾德姆誕生。愛德華茲讓全球超過500萬人能夠生下小孩。

感謝你，帶給我們希望，R.I.P.

試管嬰兒之父 87歲安詳離世

政府IVF，START！

程序1﹚~ 家庭醫生
2012年12月5日，去睇開既家庭醫生，同佢話想去政府睇不育，佢好爽快就寫咗referral letter俾我。

程序2﹚~ 東區醫院
2013年1月19日﹙星期六﹚，親身去咗東區醫院打算睇婦產科，點知原來星期六/日都係唔開的，詢問處俾咗個電話我，叫我可以打去問。2013年2月15日，因為失咗業，好得閒，所以終於打咗去東區醫院，個電話都幾難打得通，打通咗佢就叫我fax HKID、醫生寫既referral letter、聯絡電話、同住址証明過去，過咗一兩日就覆我4月2日可以見醫生啦，不過後嚟佢話醫生有事，改咗4月9日先見。

4月9日去咗東區醫院見醫生，淨係揾邊樹登記，之後邊樹俾錢都揾到矇，都唔明點解唔係同一樹做晒，anyways，政府既野就係咁費解。約咗11點，我10:45到了，等到差不多11:10就有得睇了，算係好準時啦。開頭醫生淨係見我，叫老公係房外面等（唔知點解），醫生循例問我係咪想生仔、結咗婚幾耐、無避孕幾多年、之前用咩方法避孕、用過d咩方法生b、有無睇過私家醫生、食過幾多次排卵藥、有無小產過等等。答完佢呢串問題，我開始同佢講我既情況，佢聽完之後就話叫埋老公入嚟，佢話依我做過ivf都唔成功既情況嚟睇，東區醫院幫我唔到，因為東區只有iui，加上老公精子形態只有1%，iui洗完之後分分鐘渣都無得淨（佢咁講好好笑），所以一定係做ivf，佢問我點解唔再係私家做ivf，我好認真兼皺晒眉咁同佢話：「我地無錢啦。」

佢話可以refer我地去瑪麗，但我地要先決定排私家隊定公家隊，因為佢要寫係封referral letter度，私家隊應該半年內排到，大概要7萬，公家隊通常一年半後先會收到電話通知個期，通常排到39歲先有得做，私家/公家都係無得指定醫生，只可排一邊。老公差d想排私，但予其只係平3萬，覆診地點又超級唔就腳，覆診等候時間又長，我覺得唔值囉，同埋如果而家再唔開始排公，過多半年可能排唔到架啦嗎，所以我堅持話排公！之後醫生話其實你排排下公，之後話轉私隊都得既，車~~~

程序3﹚~ 瑪麗醫院

接過東區醫院既referral letter，4月10日即刻去咗瑪麗醫院，唔想老公晒時間去搵搵搵同等等等，所以我自己一個去。去正院詢問處問問，不育去S座5樓﹙即婦產科﹚，4:15pm去到，無咩人唔洗等，姑娘係我封信打咗個date chop，就叫我出去多用途室俾封信另一個姑娘睇，姑娘問有無帶老公身份證，大鑊，無！好在姑娘話叫老公whatsapp過嚟都可以，家陣有whatsapp真好！之後我又醒起無帶結婚證明書，但好在原來唔洗睇。姑娘同我話而家要等到2015先有醫生見，俾咗個登記號碼我，見醫生既半年前會有人打俾我，跟住老公要留兩次丁丁化驗，第一次同第2次相隔2-3星期，丁丁要一小時內送到QMH，事關我地住得遠，應該一小時內去唔到，姑娘話可以嚟到先去廁所攪，係呀，係廁所ja，唔會好似私家咁有獨立房，有埋4仔你睇ga，真係辛苦老公了... 姑娘仲俾定兩個丁丁container我，事關成2015先有醫生見，我問姑娘d container會唔會過期ga？佢話唔會，因為2016年先過期，係勁喎，不過我好驚到時唔見咗囉.... 

就係咁，我就開始咗等等等了！

一個好消息+一個壞消息

好消息就係，我揾到工啦！Office係屋企附近，行5mins就到，原本如果有b，呢份工對我嚟講簡直係perfect，因為lunch time可以返屋企睇b，放工又唔洗5mins就返到屋企，你話幾好呢，可惜。。。家陣返工咁近都唔知為乜？！

壞消息就係，東華學院個研究，我抽唔中，即係，我只剩下若干年後既公家ivf呢個機會。而家，一切靠晒個天啦。

點都好，揾到份工，新的開始，新的希望，唔生仔就努力做野啦。以前係大公司做，見住d同事生完一胎又一胎，係咁放產假，但我就只有日做夜做，放咗工就打針，放例假時就去抽卵、放胎，真係同人唔同命。新公司，人少少，唔洗眼紅人地有得生自己無，應該會開心d。

失業第9/10個星期 – 搵到工啦！

失業第9個星期，好開心又有工見啦，有份仲要係2nd interview，但經過之前衰咗既經驗，今次要好謹慎先得，上次既經驗話俾我知，切忌開心得太早，同埋要prepare得好d，前一日先research下間公司係做咩既，盡量令自己好中意好中意呢間公司，同埋諗定一d有深度少少既問題問個interviewer，因為唔可以俾個interview有dead air，如果一尾得佢問你答，佢就只可以越問越深，越問越離題，離咗題而你又再答唔到咀，就只會令你出醜，另外，人地問乜，你都話咗識先囉﹙上次3rd interview，佢問我10樣我有7樣話唔識，但返到屋企諗諗下，其實我識ga wor，真係蠢咗！﹚。。。

憑著呢個策略，呢兩個interviews我都成功咁邁向下一步了。不過亦都因為咁緊張，我有好多晚都瞓得唔好，見工其實真係好大壓力，話哂已經失業了兩個多月，自信心漸漸被打擊了，加上剛剛又放胎失敗，真係覺得自己好廢，好唔開心，但若言失去了自信，見工都好難成功，所以我好快就掉走了呢d負能量！

第10個星期，上星期1st in個份有得2nd interview了，因為知道另一份應該成功了，又覺得o個份好似好d，所以呢個interview我表現得無咁有passion，同埋有d野hea答了，其實咁樣真係唔係好啱。而另外一份，3rd interview之後都已經confirm咗會請，不過就未confirm邊日上工。

人就係咁犯賤，忽然間，我又中意返我hea答咗個份多過confirm咗個份喎，可惜，已經返唔到轉頭，但老公就中意confirm咗個份囉，近屋企又無咁大壓力喎。不過點都好，10個星期就搵到工，真係要還神啦