割子宮息肉

今日入院割子宮息肉了，10am開始禁食，3點多已經係手術室出面等，當時已經好肚餓，手術前醫生問我有無咩想問，我第一時間問幾時可以食野，同埋要唔要戒口，醫生話係小手術，醒咗就可以食野，唔洗戒口。

麻醉師又循例問下我有無藥物敏感，之前有無試過全身麻醉，我話有，上年2月通輸卵管先麻醉過，我話今次可唔可以輕手d，我驚我越來越蠢，佢話女人蠢d可愛d喎，其實d麻醉師都幾有幽默感，但佢幫我麻醉時，duk得我好痛。。。

4pm入手術室，4:30已經攪掂兼醒了。手術完畢醫生攞咗d相同已經割了出來既息肉俾我睇，其實都真係幾大粒，有手指尾一節骨咁大，未有bb前，其實我地個子宮係好細架ja，所以就算得手指尾一節骨咁大，加上個位生得近中間，足以阻住1/3 - 半個子宮，真係會影響著床，醫生話割咗之後，雪胎就有大把位著床，應該唔會有問題囉喎。

返到病房姑娘話我要4小時後先可以食野，我話醫生話即刻食得架喎，姑娘話唔得，水都唔飲得，驚我會嘔，個肚係咁gulu gulu，又瞓唔著，真難捱。

6點多我決定唔理佢，飲咗啖水再食咗半個豬仔飽，無嘔喎。7點幾就同老公係醫院開餐，食飽飽，睇陣ipad，玩陣candy crush，9點幾就瞓。不過都唔係瞓得幾好，零晨4點幾有人大叫，攪到我醒咗之後都唔係好瞓得返。