是日晚餐: 生炒糯米飯

事關我老公好鐘意生炒糯米飯, 出街食嗰d又好油, 有次肥媽教煮生炒糯米飯, 好似好容易咁, 就試下自己煮啦! 第一次失敗咗,因為糯米浸得唔夠耐 (只浸了3~4個鐘),又落得太多水,攪到似糯米雞多過似糯米飯, 之後就放棄咗, 但仲有好大包糯米係度, 唔知點算?! 後嚟有次係都市日報又見到教煮生炒糯米飯, 原來秘訣就係 “慢火快炒”. 我決定試第二次, 唔錯… 不過因我怕又會失敗, 所以是次無加臘腸或臘肉.

今晚係我第三次煮生炒糯米飯….

材料: 糯米, 冬菇, 蝦米, 臘腸

調味: 生抽, 老抽, 砂糖, 胡椒粉 各少許

做法:

1)   先把糯米, 冬菇, 蝦米 浸兩日. 將冬菇及蝦米揸乾水, 洗淨切粒.

2)   臘腸切片(或切粒).

3)   冬菇, 蝦米及臘腸 落鑊炒香, 加少許砂糖及胡椒粉調味, 盛起待用.

4)   糯米隔水.

5)   先把鑊燒紅 (最好用易潔鑊), 之後落油 (約兩湯匙), 油滾便可將糯米落鑊炒, 收至中火, 邊炒逿加水 (不用太多, 糯米開始軟身便夠).

6)   加入冬菇, 蝦米及臘腸, 再以生抽及老抽調味.

7)   一直炒至糯米軟身及乾身即成.

有興趣不防試下自己煮啦!