1月3日 10:30am 穿水 →住院day2

今朝8am食完早餐，10:30am又覺得餓了，想落Canteen食個早餐，睇陣電視。起身準備去個廁所先，點知就feel到有水herher聲咁流，好在已經換咗大m巾，如果唔係應該流到成褲都係，去到廁所check下條巾，摸落都唔係好濕（事關我隻m巾太好），聞落有小小尿味，走返出嚟諗住同姑娘講話穿水，但諗諗下陪月話尿急會滲尿架喎，為免報假案，尿尿咗先再睇下點。又入返去廁所，又係一路行一路流水，之後一坐低，尿都未屙就有一篤水流咗出嚟，抹既時候聞過無味無色，今次真係似穿水喎。

同姑娘講咗，佢話幫我叫醫生嚟睇。11am開始叫，一直到1:30pm都未叫到一個醫生返嚟，完全唔明點解可以成個婦產科，成朝連一個醫生都無都得既？！唉，政府就係咁。。。

今次我都幾肯定自己係穿水，因為一坐/企起身就有水herher聲咁流，已經濕透咗一條大m巾，我個fd叫我即刻call老公嚟，帶埋走佬袋，因為一入咗產房就會收電話，驚通知唔到佢。11點幾老公嚟到，放低大小走佬袋就落返去登記處問upgrade房既手續，點知原來要係我呢邊病房申請的，咁我即刻同姑娘講啦，但佢係咁話要等醫生confirm我生得先幫我申請，真係激氣！等等等，全世界都係度等醫生，等到大概1:30pm終於見人了，醫生。。。帶住個實習醫生（男的）對住我，教佢點樣check係咪穿羊水，教佢放鴨咀夾，整到我好痛 {(>_<)}

之前因為醫生一直未confirm我生得未，所以未入得產房，又未係探病時間，老公只可以係出面等，去Canteen食個晏，慢慢坐。我就因為穿咗水，唔敢周圍走，要留係病床，就算大家係同一地方，都見唔到老公，直至醫生檢查完，話我穿咗水，但子宮頸1度都未開，我就成褲濕晒都出去見一見老公，知道未入得產房，叫佢走先。

6pm探病時間到，老公又好準時到，我食完醫院飯又同老公落canteen食飯，之後又周圍行下拍下拖，每日都好珍惜6-8pm呢段見老公時間。希望快d上到半私家房，可以見老公耐d啦。

一直都無痛，姑娘話穿水18小時後，即零晨4:30開始，每4小時要打一次抗生素，直至第二朝早上7-8am等醫生返工就入產房催生，老公都要預返7/8am到，之後可以一直係產房陪我。

1月2日 8:30pm 見紅 →住院day1（續）

係醫院真係好悶，隔離床個大6女人成日係度講電話，好嘈，對面床o個個又係度咳，諗諗下好想出院，無理由流分泌都要留院架嗎。醫生唔俾我出院既理由，係有人試過一行出醫院就穿水，如果真係咁靈，咁聽朝先出院都可能穿架喎，咁今晚穿好過聽朝穿啦，呢個理由完全無科學根據，但為咗阿B早日出嚟，我決定堅持出院 <(‵▽′)>

因為老公嚟到（探病時間6-8pm），6pm開始同姑娘講話要出院，一路都無聲氣，病房唔俾探病人仕係度食野，老公肚餓，我就催多次姑娘，姑娘話醫生未返，同姑娘講低我同老公落canteen食野，醫生返嚟call我mobile，但成8點都無聲氣，我叫老公走先，如果走得我自己走，都係搭的士啫，我又無事無幹，老公送返我上病房就走了，之後我想便便，點知一除褲就見到個護墊紅晒，即刻打俾老公匯報，但都要便便埋先可以出去同姑娘講。

同姑娘講咗，佢好震定喎，淨係叫我換衛生巾，之後等穿水等痛，又摸下我個肚話實咗，應該差不多。再寸下我問我仲要唔要出院，我話出得我都出架。

問咗個fd，佢見紅之後成1-2星期先生得，不過佢早見紅，最終edd+1生，我真係有d驚我會俾東區禁錮到生完先走得，慘！

之前未見紅時問過，如果堅持出院要簽免責，如果聽朝真係再無見紅，我一定簽，總好過係度瞓到1月8日催生，仲要每日得6-8pm先見到老公，又無電視睇，又無得行下街，真係悶爆。有諗過upgrade上半私家房，但由今日up到生完出院，分分鐘成10日，成2萬4喎，都係簽免責出院好過。

40週，分泌物多咗 →住院day1

我上網見d人話因為個胎越來越大，膀肛壓力大咗，可能會滲尿。通知陪月個肚未有動靜，順便講咗幾句，陪月同我話，除非有埋尿急既感覺，先會滲尿。我係無尿急感覺下，間唔時有野滲出嚟，通常係行街行得耐會滲多d，但聞過有味，個肚又無細到（如果穿水，個肚少咗水，理應細咗架嗎），所以我覺得唔似穿水囉。

我日日都有用護墊，大概由12月30日開始，間唔時個護墊會好濕，一日要換2-3塊（之前一日一塊），但無見紅，無痛，唯一係覺得d分泌物陣味越來越難頂。

陪月叫我打去醫院問下，醫院就叫我可以入院check。同老公商量過，都覺得入院check下穩陣d。

洗個頭，食埋晏就去咗東區，登記處個人話會即時入院，我仲以為會check下confirm真係穿水先會入院，但咁都無辦法啦。入咗院，姑娘話可能要留一晚觀察，因為我只係小小小小咁滲，好難講係穿水定滲尿。唉，真係攞嚟搞，無啦啦要瞓一晚醫院！

咩都未照，d姑娘就當我真係穿水，話我做咩唔帶定走佬袋，係咁話穿水就要入院架啦，但我真係覺得似滲尿多d喎。。。

上咗床，駁咗部機，check BB郁動同心跳，要check半個鐘。真係唔明，check穿水定尿都要搞咁多野。姑娘話如果我唔想留院一陣同醫生講。

其實同一時間，有另外一個大肚婆入嚟，佢話肚痛，每15分鐘痛一次，但姑娘都選擇睇咗我先。問咗個fd點解，佢話因為另外個媽媽一定係陣痛，15分鐘先痛一次，即係未得。哦，原來係咁。。。

醫生幫我做陰道檢查，睇完話只係見到d白色既分泌物，無水，但都係唔俾走。

照埋超聲波，BB家陣3.1kg，confirm未穿水，再問多次醫生，都係唔俾走。

醫生話如果穿水係會流好多水，護墊一定頂唔住的，同埋會有少少紅色/綠色，而我個d係分泌物，有味、黃色/白色的，仲要個護墊無濕透，所以一定唔係穿水。

Check完晒所有野都未夠3點，無野好做，有排悶。今日見既醫生，好似係我31號產檢時見o個個，真係後悔當日唔記得問佢點分穿水定滲尿，攪到自己無啦啦瞓一晚醫院。。。

36週，開始水腫了 (o_0)

一踏入第36週，忽然d鞋開始迫了，之前著開有兩對鬆鬆地既鞋都迫，無鞋著，唔通真係要日日著Crocs？！手都其實有少少腫，尤其係剛剛瞓醒。有時食野既時候，覺得連個咀都腫，所以唔敢食太濃味既野。即刻煲咗d紅豆，聽聞去水腫好得，飲咗一杯紅豆水，食埋d紅豆，初頭好似有少少幫助，但之後都係腫返。個鼻又真係開始大咗少少，d人話陀仔會大鼻，大既程度因人而異，希望唔會太大啦，我得閒就“鍊”下個鼻，等佢睇落無咁大 ：P

個人又開始越來越滾，成日覺得好熱，面呀、身呀都覺得好滾，係滾到會出汗架喎，以為自己發燒，但摸過發現面、額頭、身、腳都唔熱，只係手心同腳掌熱，真係好奇怪。

Keep住有去政府健康院（32週開始每兩星期一次），但健康院只係有得聽b心跳，仲要部機其實未埋到身已經有聲，fuk fuk fuk咁聲，姑娘話係bb既心跳聲喎，我真係唔識聽，之後淨係會同你講話「正常」，但幾多為之正常呢？120bpm定150bpm？佢係唔會答你架。同你度子宮，又只係會話「正常」，問佢估計bb家陣幾多磅？個頭係邊？對腳放邊？佢就會答你：「我唔係超聲波，我唔知架」。。。另外，會同你驗尿、磅重，如果d尿有事就叫你飲d水、坐一陣，再驗多次，蛾下你話下次記住自己帶尿，要晨早未食野前第一督尿；如果重得多咗（每星期只可重1lb），就蛾下你記住要均衡飲食，個b肥得濟唔好架，再俾本飲食指南你；如果無重到呢，就蛾你要食返多d野，懷孕期間唔可以減肥架，仲問我係咪因為唔開心食唔落野，真係暈。。。次次去都係見唔同既姑娘，佢地蛾我之前又唔會睇返我overall或上星期重咗幾多，總之你唔係exactly每星期重1lb就蛾你，真係幾無奈。到你問佢野，例如我手痛、手痺，對腳紅咗一撻撻係咪正常，佢就只會叫你去睇醫生，衰d講句，健康院都真係幾廢。。。

穩陣d，都係去睇返陳醫生，睇下阿b家陣幾重、有無臍帶纏頸，同埋想見下阿b個樣，老公就想確認下阿b係咪真係囝。我同陳醫生話我個肚右邊成日凸咗出嚟，想知係咩嚟既，佢一照就睇到係腳，同埋個胎盤都側咗去右邊，再順手照到老公最想睇既野--噹噹(⌒▽⌒) 之後度下阿b個頭既size，睇下尾龍骨、腳骨、腳趾，話阿b家陣2.3kg，少少偏細，但無問題的，頭唔係特別大，臍帶纏咗一圈，跟住就照下阿b個樣，塊面肥嘟嘟，隻手又放係個咀度，好似好怕羞咁，哈哈^_^

下星期係政府會做乙型練球菌測試，我個fd話驗到有問題就最好開刀生，避免bb係陰道出世時感染到d菌，問咗健康院姑娘同陳醫生，都話就算有菌，打支針就可以如常順產，不過都希望結果正常啦。

雪胎續期

11月11日，陳醫生姑娘打嚟通知我雪胎兒們原來早於8月已經到期，問我續唔續，續就每半年$5000。一直同老公都覺得一係唔生，一生就要生兩個，好等佢地有個伴，同埋唔會有公主/公子病，所以我就自己揸主意同姑娘話先續一年，即係到出年8月。

之後同老公講咗，老公都同意，不過老公話不如到期前放埋，BB預產期出年1月，1月生完，8月前放胎，萬一中咗，我個肚咪唔洗抖？=.=''''' 另一個問題就係，咁我咪又唔洗搵工？

27-32週，懶懶懶 (_ _).｡o○

個人越來越懶，懶到blog都無寫，日日瞓到成11點先起身，早餐連午餐一次過食，之後3點幾又瞓晏覺+hea係張床度，懶到連約朋友食晏都懶，有時仲懶到晚飯都係老公放咗工返到屋企先開始煮，老公有時都睇唔過眼話我兩句，不過其實自己都頂自己唔順。

唔洗返工、唔洗做家務，只係間中煮下飯、洗下碗，對於我嚟講，呢d簡直係超級女皇既生活，不過女皇生活就只係剩返兩個月，我要好好珍惜。。。

Update返呢幾個星期做過d咩先：

27週，想來想去，去搵返林淑儀醫生，因為原來我個fd兩胎都係搵佢接生的，兩胎都順產，又任你揀邊間醫院，診所又就腳，諗住到我個肚鑼咁大既時候，復診都無咁辛苦，可惜，當佢知道我打算去政府生既時候，佢就問：「咁你今日嚟搵我想做咩？」我&老公答：「普通產檢，照下個b咁囉，順便睇下性別。」跟住林醫生就叫我瞓上床，好仔細咁同我照，頭、腳、手、噹噹、面、心、肺，感覺同我認識既林醫生好唔同（以前睇症睇得好急，問多兩句佢就趕我走），之後到照腎，佢話睇唔清，可能有事，叫我出去坐一陣再入嚟照過，咦？咁似我上個月照結構咁既？！開始有d不安，不安既係擔心阿b有事，但心諗上次照結構都無話有事，無理由而家有事架，另外不安既就係診金，照咗成半個鐘，仲要有得照多次，以我認識既林醫生，係唔會賣大包既，張單實大鑊。。。果然不出我所料，翻照阿b個腎無事，但張單就盛惠$2280，林醫生幫我照多次結構。。。老公好嬲，話佢呃錢 (•̀__•́)୨

30週，又要驗糖尿，今次有晒經驗，好輕鬆，無壓力。因為等待第二次抽血期間會播video，講下產前須知、入院程序、產後處理資料等等，所以今次叫埋老公嚟睇兼陪我。同上次一樣，有事先會有電話通知，星期一都無收到電話，又順利過一關 ^_^

31週開始，轉去西灣河健康院繼續產檢。原來係健康既媽媽&BB先會轉去健康院的，知道我同BB都健康，都幾安心。去到健康院，登記咗就去自助量血壓，第一次玩感覺幾得意，之後就去磅重同驗尿，有朋友覺得帶尿好麻煩，但我又覺得唔帶仲麻煩，事關要忍尿，又要即場去廁所，都幾費心同嘥時間，仲要俾姑娘“鵝”，叫你下次記住帶。我有次試過唔夠尿，攪到驗到有蛋白，要狂飲水，之後再驗過，都嘥咗半個至一個鐘，自此我都係帶定尿，唔洗煩。第一次去有個breifing，介紹下健康院係做咩，之後會有得見姑娘同醫生，醫生只係第一次先有得見，之後要視乎需要先有得見，不過就算有醫生見，都只係聽心跳，無得照超聲波，我覺得同見姑娘無咩分別，分別在於如果有唔舒服，可以問下佢意見，好似我對腳起咗一撻紅色，唔痕唔痛的，醫生話可以不理，生完先算，同一個問題問姑娘，佢就會叫我出去睇醫生（即健康院以外既普通科）囉。見完醫生就約下一次覆診，每兩星期一次，每次都係星期四，可以揀9am、10am或者11am，我揀咗10am。

21週，照結構

終於等到照結構的日子，開估BB究竟係囝定囡啦。之前陳醫生同莫醫生照完都話似係囝，d人又話陀囝會皮膚差，但我無喎，又話個肚形會尖d，但我又幾圓咁喎，所以真係估佢唔到。

好啦，10：30am 到東區啦。係主座登記完就上D7病房，巡例要驗尿同量血壓，之後就係等。之前幾次產檢都係等大約半個鐘，今次等咗45分鐘都無聲氣，之後聽到後面個準爸爸鬧話足足等咗兩個鐘，嘩，唔係嗎？兩個鐘，咁我咪仲有排等？！好在我食咗個豐富早餐，再買定咗個豬柳蛋漢堡先嚟啫，如果唔係咪餓屎？！最後大概11：55am 到我了，等咗差不多個半鐘。。。

醫生都好細心咁幫我照，初初都係照下頭骨、脊骨、大腿骨、小腿骨、手臂骨、手指、腳趾是否齊全，再照下有無兔唇，睇下鼻仔同眼仔，跟住我同老公已經急不及待問BB性別了，照咗好耐先照到，哈哈，見到噹噹啦，係囝呀 ≧▽≦ 

醫生繼續照肝、腎、肺，但因為BB扒咗係度，照唔清個心，醫生話一定要見到個心有4房先得，要我出去行15分鐘，等BB轉位先再試下照，出去行既時候已經成1pm，真係有d餓了，一路行一路叫BB快d轉身，等醫生照清楚晒，我先可以去食晏架。終於照到個心都正常，走得，走既時候已經差不多1：30pm了，攪咗成3粒鐘，真係好攰。。。